Ka rualpa in i simmi thu cu TV Television ih bawlungsit a zoh rerolai ah a fanute a kiang ah a lek rero. A ṭanmi team ih thiam lo ruangah a thinheng ih a kiang ih nauhak lehnak pakhat cu la tahrat in a hlon ih a siat thluh. A fanute ih duhbikmi zukte cu a siat thluh ruangah a thin a naa. Ka rualpa cun a fanute cu a pom ih a leem lohli. A siatmi siangnaute (toy) ai ah a dang a leisakmi in a ṭha saal ti'n a ruat. Asinan a theih lomi cu a thinhen langtermi in a fanute kum (4) mi kha ziangtluk in a thin a phangter ih a tuarnaater timi hi a si. Asinan ngaidamnak tikcu caan cu a rung thleng leh saal.   Kum tam nawn a rei hnu ah fanau nei zikte a ruahsan reromi a fanu hnenah a siattermi zuk vek rori kha lei in a kuat. A fanu cun a pa ih kuatmi toy milemzuk cu facebook ah a thlah (post) ih hiti'n ca a ngan, "Hih laksawng hin thuanthu saupi a nei ih ka nauhaklai thu a si. Cumi cu lungawinak thuanthu a rak si lo, asinan atu ahcun lungawinak thawn a cemnet thei zo! Damtersaalnak cu thil ṭha a si. Ka lung a awi!"   Bible in thinheng ih puakkuainak cu hrial dingin in forh, "Pathian hmuihmel keng ih tuahmi, a ding le a thianghlim ih a langmi nunnak dik, nan nun thar kha hruk uh" (Efe. 4:24). Cun kan thin a heng asile Bible in, "Cupawl ai ah pakhat le pakhat zaangfah thinneemnak nei awton uhla, Khrih sungih Pathian in a lo ngaidam bangin pakhat le pakhat ngaidam aw uh" (c. 32) in ti.   A siat zomi pehtlaihnak remsaal cu thil ol a si lo, asinan cumi cu Pathian zaangfahnak cun a cang thei a si.                                                                                       - David McCasland   Sualsirnak le ngaidamnak cu a catzomi pehzomnak remter saal theitu khuaiseng (glue) a si.