2008 kum ah, inn man pawl nasatak in a tlak. Asinan zarh (2) hnu ah ka pasal le kei in kum (40) a simi kan inn cu market ah kan than. Inn lei a duhtu mi pakhat in man ṭhape dingin in sim tikah zuar dingin kan lungkim. Cuti'n a rei hlanah innsaktu pawl in ro ka comi inn sak dingin hram an thok, cumi cu kan inn thar ding a si. Asinan kan inn hlun zuarmi netabik thuhla a fiangfel hlanah kan inn i leitu ding pa cu a hnukdawk aw saal. Kan buai nasa thlang. Atu ahcun inn pahnih nei ah kan cang – inn pakhat cu a man nasatak in a tla, ih kan zuar thei laklawh lo, inn thar ah le kan va ṭhawn aw thei fawn lo. Inn leitu ding mi thar kan hmuh lai hlan lo innsaktu pa hnenih paisa pek ding kan nei lo. Cuti'n thil cang thei lomi hmason dinhmun ih ding kan si.   Joshua in Jerikho khua do dingih a umlai caan ah, hngetkhohzet ih dawlmi khuakulh kotka cu an khar. A thinlung sungih a suakmi cu thil cang thei lo dinhmun ka hmason si hi ti a si (Joshua 5:13-6:27). Asinan mi pakhat cu ralnaam zuuk ciami keng in a hmai ah a ra ding. Bible thiam pawl in hi Mipa cu Amah Jesuh a si ding ti'n an zum. Joshua cun a hei naih ih, "Kanmah ih milai na si maw kan ral so na si?" tiah a sut. Cutikah cupa cun, "Zo ih milai hman ka si lo; Bawipa ih ralkap pawl hotu ka si ih hinah ka ra," a ti (Joshua 5:14). Cutikah Joshua cu leilung ah upatnak thawn a bok ih, "Bawipa, kei na salpa hnenah ziangso na sim duhmi a um" tiah a sut tikah, "Na kedam phuak aw hmun thianghlim ah na um" tiah a ti.   Joshua in Jerikho khua cu ziangti'n ka do neh ding ti a thei lo, asinan Pathian thuthlun in a do tikah minunglam in thil cang thei lo tiih ruahmi cu atak in a cang suak a si.                                                                                                   Marion Stroud   Pathian hrangah a cang thei lomi zianghman a um lo.