Evangelist le Christian hruaitu pawl 10,000 lenglo cu 1986 kum ah Amsterdam khua ih auditorium inn tumpi sungah leitlun huap mi hminthang evangelist Billy Graham ih thusim ngai dingin an tokhawm. Cumi pawl lakah kei tla ka tel ve, ih a tontehmi pawl a run simmi ka rak ngai ṭha. Cun a thusimmi sungah ka mangzetmi cu, "Pathian ih minung pawl hmai ah thuthangṭha sim dingih ka din tinte'n ka khuk a ṭhia ringring timi ka lo sim duh," a timi hi a si.   Ka khuaruah a har. Thuthangṭha sim thiam maksakzet pakhat mipi thawnghra lengkai hnenah huham neizet ih thusim ṭheutu pa cu ziangti'n a khuk a thir thei si pei? tiin. Cule a sim betmi cu stage parih nan kai tikah ttih hlah uh, asinan tangdor le thinneem in Pathian ih in kawhnak ah kanmai' tlinnak in a daihcang lo, timi thu a sim. Evangelist maksak Billy Graham cun amai' ṭong thiamnak ring loin Pathian lawng a rinsan.   Moses cu Pathian in Egypt ram ah kum (400) sung sal taangmi Israel mipi pawl ruunsuak dingih a thlah tikah ka tlingtlak lo, ti a thei aw. Moses in Pathian hnenah midang sawn thlah dingin a dil, thusim thiam a si lo, ṭong-hak a si ruangah a ti (Suah. 4:10-13).   Kannih tla Pathian in a hnaṭuantu dingih in kawh tikah cumi vek ṭihnak kan nei ve thei men. Asinan Moses hnenih tha a peknak cu kanmah hrangah tla a si ve: "Feh aw, na ṭongnak ah ka lo bawm dingih na ttong dingmi khal ka lo sim ding" (Suah. 4:12).   Billy Graham ih sim bangin, "Pathian in a lo kawh tikah ṭihphang in na khuk ṭhia hlah seh, ziangahtile na hnenah Amah a um ding."                                                                                                                                                                         Lawrence Darmani   Pathian cu in thlahnak hmuntin ah kan kiangah a um ve.