Nitinte in a pa cu a hngawng a dok ih lamhlapi zinlam hoi in a fapa ih inn ra tlun saal ding caan hngak in a um. Cule zaantinte in thin nuam lozet in a it ṭheu. Asinan nikhat ni cu lamhlapi ah thil pakhat a hmu. Van tlolakpi sirhsan in mi pakhat ding vek khin a lang. A Pa cun, "Ka fapa a si pei maw aw?" ti'n khuaruahhar in a um. Cun a hei naih vingvo ih a theih neelzet mipa a si. A si, amah cu a fapa a si.   Cule a fapa cu lamhla nawn ah a silai ih a pa in a hei hmuh tikah duhdawtnak le zaangfahnak in a khat, a tlan ciamco ih a hngawng in a va kuah ih a va hnam (Luka 15:20). Nisuahnak Laifang (Middle East) ram umtu pawl ih nunphung (culture) ahcun, pacang pakhat tlan ciamco timi cu upat hmaizah tlak lo um daan zia a si tiih an ruahmi a si. Curuangah, Pacang pa pakhat tlan rero in a fapa a va pom timi cu hminsin tlakzet innsungsang mi karlak ih duhdawtnak langtertu a si. A Pa cu a fapa tlan hlo zo a ra kir saalmi a hmuh tikah a lungawinak a nasatuk ruangah suup aw thei loin a tlan reronak a si.   A fapa cu cuti vekih hmuah rero tlakmi a si lo. A pa hnenah a roco dingmi a dil tahrat ih inn ihsin a suak tikah, a pa cu a duh le thi ko seh ti tlukin a ruat zomi a si. Asinan a fapa in a pa parah ziangvek in um hmansehla Pa hrangah a fapa cu a fapa a si thotho ko (c. 24).   Hih thuanthu hin Pathian ih kei misual in cosaannak cu duhdawt tlak ka si ruangah si loin A duhdawtnak a nasatuk ruangah a si sawn. Cumi in Pathian zaangfahnak ih ban lo ding khop in sualnak sungah ka pil lo ding, timi in theihter. Vancung ih um kan Pa cun a baan pharh le saangka ongin duhdawtnak thawn in hngak ringring a si.                                                                                                   Poh Fang Chia   Kannih cu hremnak le ngaidamnak; Pathian ih thinhennak le duhdawtnak co tlak kan si.