Ka rualpa Gus cu kan dung nai thla rei lote ah a thi. Gus cu nga kaih thiamzet mi a si. Zarh ni tinte'n a lawng (boat) thawn an inn kiang ih tili ah nga kai in hmuh a si ṭheu. Ni khat cu a fanu Heidi hnen ihsin cakuat pakhat ka ngah. In simmi cu a tule pawl thawn vanram thu kan rel tlang rero, ziangahtile an pu Gus cu vanram a inn ih a feh zo ruangah. Kum (6) mi a tupate, nga kaih a paih vezet mi in vanram cu ziang a bang ih a pu Gus cu ziang a tuah ding timi thu a thiam tawk in a sim ve: "Vanram (heaven) cu a mawizet, ih Jesuh cu ka pu Gus kha khuitawk ah ngan an tambik timi a sim ding," a ti.   Paul in Pathian ih a hmuhtermi vanram vision thu a sim saal tikah, minung ṭongkam in a daih lo. A simmi cu, "Keimah cu Paradis ah cawi ka si ih minung ih sim le rel theih a si lomi le simrel siansak lomi thu ka thei," a ti (2 Korin. 12:4). Vancungram thu cu minung awkam in langter theih a si lo – ziangruangahtile vanram thu um daan cu minung fimnak in theih baan lomi a si ruangah a si thei.   Vanram thu tampi kan theih tikah hnangamnak thawn kan khat cuang a bang, asinan Pathian Amah rori kan theih ruangah a si sawn. Ziangahtile Amah cu ka thei, ziangtluk ih mi ttha a si ti ka thei fiang. Hih leitlun nun le ziangkim ka taanta dingih vancungram ih mawinak sungah hnangam te'n ka um ding. Jesuh in "khuitawk ah nga tampi an um timi in hmuh ding," ziangahtile Amah cu mi ṭhabik a si!   Vanram thu kan theih fiang sinsin theinak dingah nitin te'n Pathian hnenah thlacam uhsi!                                                                                                             David Roper   Vancungram ih a ummi Khrih cu leitlun ih ziangmi thaw hmanin tahṭhim theih rual a si lo.