-12    Pastor nupi pakhat cu thahri thamal natnak (parkinson's disease) a nei a si, ti'n siibawi in an hmu suak. Cumi cun an innsang harsatnak a thlenh. Pastor cu a khuaruah a har, ziangti'n ka nupi ka tuamhlawm dingih kawhhran hna teh ziangti'n ka ttuan thei ding tiah! Asinan thinhar ding zianghman a um lo, ziangahtile kawhhran sungtel pawl in a nupi zohkhen le tuamhlawm ding ṭuanvo an laak sak thluh.   Tirhthlah Paul in Korin kawhhran zumtu pawl hnenah Bawipa in tumtahnak thawn thlarau laksawng a pek ciarnak thu cakuat a ngan. 1 Korin. 12:8-10 sungih thlarau laksawng pawl a tarlang hlanah ralrinnak a pekmi cu Pathian in thlarau laksawng a peknak san cu pakhat le pakhat bawm awton thei dingin a si (c. 7). Pathian in thlarau laksawng in pekmi cu kanmai' hrang hlawknak ih hman dingah si loin midang va bawm ding le Amah rian dingah a si.   Kan zate in thlarau laksawng phun dangdang ciar pek kan si ih a ṭul caan ih kan hman thei dingah a si. Thlarau laksawng cu Khrih ih ruangpum a simi kawhhran ṭhansonak dingah a si (Efesa 4:12). Pathian in khuitawk hmun ih in ret a si khal le in pekmi thlarau laksawng cu a ṭul daan ih zirin hmang thei ding kan si. Kan ciinken dingmi cu kannih zumtu mi pakhat cio hi Khrih ih ruangpum a simi kawhhran sungtel "Pumkhat kan si," timi hi a si (1 Korin. 12:13-14).   Bawipa, kawhhran in pekmi parah ka lungawi. Thlarau laksawng in pekmi hi midang pawl thazaang ka pek theinak dingah le leitlun ih thuthangṭha karhternak ding a si zia thei fiang dingin i bawm aw.                                                                                                               C. P. Hia   Midang bomnak ah na thlarau laksawng hmang aw.