"Pathian in kan tithei dingmi hnakih tam in pe dah lo," tiin mi pakhat in a fapa kum 5 mi cancer in a thimi ih hringtu pa hnenah a ti. Hih ṭongfang hi thapeknak cu asinain cumi in a thin a harter sawn, ziangahtile, a fapa a dam thei lo ruangah! A tuarnatnak cu a besiatuk ih a thawthawt a hartuk. A riahsiatnak cu a hrangah a tamtuk ti a thei ih Pathian ih bomnak le tuarpinak nasatak in ka ṭul ti a thei.   Mi hrekkhat ih an hman ṭheumi, "Pathian in nan tithei dingmi hnakih tam in a lo pe dah lo ding," timi ṭongfang cu 1 Korin. 10:13 ih, "Hniksaknak nan ton tikah nan tuar theinak dingah thazaang a lo pe dingih cuti cun nan luatnak dingah lamzin a lo sial sak ding" timi hi a si. Asinan hih ṭongfang ih a sim duhmi context cu hniksaknak (temtation) a si, tuarnak (suffering) a si lo. Hniksaknak hrial theinak lamzin cu kan hril thei, asinan tuarnak cu kan hrial thei lo.   Jesuh Amah rori in a tuar dingmi hrangah thla a cam, "Ka thinlung hi riahsiatnak in a khattuk ih a kuai ṭheh ding a bang. "Ka Pa, a cang thei a si ahcun hih tuarnak khuat-hai hin i luatter hram aw," a ti (Matt. 26:38-39). Sikhalsehla Amai' lungtho tein leitlun mi pawl rundam kan si theinak dingah thinglamtah thihnak a tuar.   Nunnak in a tuar nasatuk tikah, Pathian ih zaangfahnak sungah kan tlukluh a ṭul ih, cuti'n Amah in tuar theinak thazaang in pe ding a si.   Ka Pa, ka ṭawnṭai. Nangmah cu ka beunak le ka cahnak, harsat caan ih i bawmtu na si. Bawipa, Nangmah ka lo ko, in bawm hram aw.                                                                                                   Anne Cetas   Pathian kutcak ih umpinak in ziangtinkim na hmason thei.