American actor le hnihsuahsai thiam George Burns in hiti'n a sim, "Nun saunak hrangah ziangmi si thupibik?" ti'n thu in sut bang sehla ka lo sim theimi cu donharnak hrial aw, thinharnak le thinbangnak pawl hrial aw, ka lo ti ding. In sut lo a si khal le cumi cu ka lo sim thotho ding," a ti. Burns cu kum 100 tlun a nungdam ih mipi pawl hni uar-o ko a tuah, amai' ruahnak pekmi atak in a nunpi.   Asinan kan nunnak cu a hmun lomi, buainak le sambaunak hlir ih khatmi a si laitak ah ziangti'n so donhar loin cu kan um thei ding? Tirhthlah Peter in Jesuh dungthluntu hmuntin ih a ṭhekdarh aw thluhmi kum zabu pakhatnak san ih zumtu pawl hnenah hiti'n tha a pek: "Curuangah a cakmi Pathian ih kut hnuai ah tangdor tein um uhla Amah in a caan a kim a ti tikah a lo khaisang leh ding. Nan donharnak hmuahhmuah cu Amah ih hnenah ṭhum uh, ziangahtile Amah cu nan zawn a lo ruattu a si" (1 Peter 5:6-7).   Peter ih simmi hi tuarnak hrial dingah a si lo (c.9), asinan Satan ral kan donak ah thlangamnak kan hmu dingih huham cahnak thawn nehnak kan co theinak ding a si sawn (cc. 8-10). Zumtu cu thinharnak le beidongnak ih nehmi si loin Pathian ih lungawinak sungah zalennak pekmi kan si ih pakhat le pakhat parah Pathian duhdawtnak langter awton ding kan si.   Kan hmuitin cu kum ziangzat kan nung ding ti si loin Pathian ih in pekmi kum sungah Bawipa ih hrangah duhdawtnak thawn ziangti'n famkim in ka rian thei ding timi hi si sawn seh!                                                                                                 David McCasland   Pathian cu ka Pa a si, Anih cun hngilhmi a nei dah lo; curuangah ziangahso ka donhar rero ding?