Kan pa thawn kan fapa ih piano tum practice kan killai ah Pathian hnen thlacamnak in hram kan thok. Thla kan cam hmaisa, ziangahtile kei le ka pasal cu piano tum thiam kan si lo. Kan pathum te'n musical mysteries "staccato" le "legato" tivek pawl ih tican le piano ih black key pawl ziangti'n tum ding tivek pawl thei pek hlir kan si.   Thlacamnak kha co-u (priority) kan peknak san cu Pathian ih bomnak kan ṭul ti kan theih fiang ruangah a si. David in Keilah khua ih Filistin ral pawl do ding ṭihnung raaptlakza dinhmun ih a din tikah Pathian ih bomnak a ṭul. Raldonak caan a kim hlan ah, "David in Bawipa hnenah "Filistin pawl ka vo do pei maw?" ti'n thu a ron hmasa (1 Sam. 23:2). Pathian in a lungkimpi. Sikhalsehla, David ih milai pawl cun an ral pawl in an hringhro ti an thei. David in an ral Filistin pawl do dingin an ralnaam veikhat te hman an hawi hlanah Pathian hnenah thla a cam saal. Pathian in nehnak ka lo pe ding ti'n thu a tiamkam (c. 4).   Thlacamnak in kan nun in kaihruai maw? asilole harsat buainak kan ton caan ah kanmai' cahnak kan rinsan sawn ṭheu? A caancaan ah kanmah lam in timlam awknak tuah hmaisanak in caan kan hmang ṭheu ih cumi ttheh hnu sawn ah Pathian hnenah thluasuah kan dil ttheu. Culole kan harsat le buai hnu lawng ah thla kan cam ṭheu. Pathian in kan ṭul caan ih Amah hnen pan ding cu in duhsak ko. Asinan in duhsakmi cu ziangtik khal ah Amah kan ṭul ringring timi kan theih ding hi a si (Thufim 3:5-6).                                                                                      Jennifer Benson Schuldt   Pathian in ziangvek thil kan tuah hlan ah thlacam hmaisa taa ding a duh.  – Oswald Chambers