Africa ram ih Nile tivapi, kilometer 6,650 (peng 4,100 lenglo) saumi cu Nitlaknaklam ah a luang ih Nisuahnaklam saklam ih Africa ram pawl a pahtlang vingvo ih leitlun ih tiva saubik a si. Kum zabu tampi sung Nile tiva pi cu a pahtlangmi ram tampi ih ummi minung tampi pawl hrangah nuntu khuasaknak cawmtu a si. Atufangte ah, Ethiopia cu tidai tha thawn electric meisa (hydro-power) a sak rero ih Africa ram sungah a tumbikmi a silai ding. Africa ram hrangah electric power tampi ngah theinak source a silai ding.   Egypt siangpahrang Faroh cu Nile tivapi neitu le thoktu kan ti thei. Amah le Egypt mi pawl ih an uar awknakbik cu, "Ka Tiva pi cu keimai' taa a si; keimai' hrangah ka tuah zo," ti a si (Ezek. 29:3, 9). Annih in Pathian lawng hih leitlun ih amahte thil um ciami zate ih neitu a si timi tarlang ding an ṭhelh tariai. Cuti ih an hngaltuk ruangah Pathian in an ram mipi parah thuṭhennak ka nei ding a ti (cc. 8-9).   Kannih cu Pathian ih sersiammi kilkhawitu ding kan si, ih kan hngilh lo dingmi cu kan neihmi thil ziangtinkim hi Bawipa hnen ihsin kan ngahmi a si. Rom 11:36 sungah, "Ziang hmuahhmuah cu Amah ih sersiammi, Amah ruangih ummi le Amah hrangah an si ṭheh. Pathian hnenah kumkhua in sunlawinak cu um ko seh" ti'n a um. Pathian cu minung a sersiamtu, thititheinak a petu le thil ziangkim (resources) a umtertu Bawi a si. Ziangtik khal ah thil ziangkim kan tuahsuak tikih kan ciinken ringring dingmi cu Pathian in Isaiah 42:8 ih a simmi: "Keimah cu Bawipa ka si; cumi cu Ka Hmin a si; ih Ka sunlawinak cu zohman ka pe thei lo," a timi hi a si.                                                                                       Lawrence Darmani   Thil maksak zetzet pawl a tuah ruangah Pathian hmin cu sunglawi sin ko seh!