Compassion International ih hnaṭuan Lee Geysbeek in minu pakhat cu lamhlapi ih um nauhak a cawmmi va leeng dingin caan ṭha remcang a ngah thu a sim. Cumi nu cun farahzet ih a ummi cuih nauhak pate cu rawl dawr ah fehpi dingin thuhrisahcatnak a tuah.   Nauhak pate in humburger pakhat a cah, ih amah cawmtu nu cun salad a cah. An cahmi rawl pawl an cabuai ih a ra thlen tikah, a zohhliah ih nauhak pate cun a nun sungah himi vek rawl thaw a hmai ah hun a si dah lo ti a thei fiang aw. A hmai ih humburger tumpi a zoh hnu ah amah cawmtu nu ih hmai ahcun salad malte lawng a si kha a hei zoh hliah. Cun a naam a laak ih a burger cu a hrek in a phel hnu ah amah cawmtu (sponsor) nu hnenah a hei pek, a pum a vun cuul ih, "Na rilrawng maw?" ti'n a sut.   Nauhak farah a nun sung zianghman nei dah lo pa cu a neihmi ih a hrek rori kha a ṭul ding tiih a ruahmi hnenah siangzet ih a hlawm siangtu dinhmun ah a thleng. Hih nauhakpa teih nunnak hi neta caan khatkhat ah taksa daan in siseh, thinlung daan in siseh, thlarau daan in siseh bom ṭulmi mi pakhatkhat na hmuhton tikah ralrinnak a lo petu ah a cang thei. Jesuh Khrih zumtu kan nunnak ah zumnak kan neihmi hi kan nunnak ah atak in kan langter a ttul (Jeim 2:17).   Nitinte a ṭulsam mi pawl thawn kan tong aw ringring. A hrek cu leitlun huap, a hrek cu na kiangnai ah. Mihrek cu rawl hlumsa an ṭul, ih a hrek cu zawnruahnak awkam an ṭul. Khrih ih dungthluntu, A duhdawtnak cotu pawl in thil ṭha tuah in kan hlawm lo ding maw?                                                                                                               Dave Branon     Minung ih ṭuanvo sunglawibik cu thil ṭha tuah hi a si.