Ka rualpa Ed in a fapa te ih thu in sim rero. A fapa cu ciarbeek ih a khatmi tili sungah a ding, curuangah ka rualpa in tili sung ihsin hung suak aw, a ti. Asinan a fapa te cu suak duh cuang loin ciarbeek sung ahcun a feh rero thotho. "Tlan bet nawn hlah," ti'n a sim. Curuangah nauhak pa te cu tidai umnaklam ah a feh thok. Ed in a fapa cu "Feh nawn hlah!" a ti tikah nauhak pa cu tidai sungah a ke zungpi parah a dingih a pa cu thinhengzet mithmai thawn ral vekin a zoh. Nauhak pa in a pa ih tuahter a duhmi a thei ko nain a tuah duh lo.   A caancaan ah kei tla cuih nauhak lungruhzet mipa vek ka bang ṭheu. Ka tuah reromi thil in Bawipa a lungawiter lo ti ka thei ko, asinan ngah ko in ka tuah thotho. Pathian in Israel mi pawl hnenah, "Bawipa nan Pathian ih thu cu kim tein thun uh!" a ti (Daan. 28:1), asinan Israel mi pawl cun atu le atu Pathian thu ngai duh loin anmah duhduh in an um thotho. Saam cangantu in 119:5 ah, "Na daan terek pawl tiangin fel tein thlun thei ningla ka va duh so!" a ti (c. 5).   Iksiknak, huatnak, le doralnak – pawl a suak cingcing. Asinan rundam kan si theinak dingah Pathian in A Fapa Jesuh Khrih cu kan hrangah raithawinak ah a pek zo. Thlarau Thianghlim in sualforh kan ton caan ah in bawm (1 Korin. 10:13); ih kan thil tipalhmi kan phuang a si ahcun Pathian in ngaithiam dingin thu in kam (1 Johan 1:9).   Nang tla keimah vekin ciarbeek sungih kir saal cingcingtu na si pang le na beidong hlah. Pathian in tukforhnak neh theinak thazaang a lo pe ding. A cem thei lomi duhdawtnak thawn a lo duhdawt a si.                                                                                                             Dave Egner   Turhforhnak na neh theinak dingah Khrih in na nunnak lo uk seh.