Pathian in hnar in rimthaw theih theinak (sense) in pekmi hi lungawi um ka tituk, ziangahtile rimhmui tampi hnim in kan nuam aw thei. Zing hung tho ih thianhlimnak tuah ih rimhmui culh awk khi nuam ka tizet. Ṭhaal caan inn kiangkap hrampi aat ṭheh pekte rim tla khi thaw ka ti. Ahleice in kan inn dunglam ih ka to caan ah kan pangpar duum sungih ka duhbikmi hninsi (rose) par rimhmuite thli in ka hnar sungih a run hran caante khi cu nuam ka tituk. Cuthluh hnu ah ei ding rawl thawthaw pawl ih rim tla thaw ka ti theizet.   Curuangah Paul in "Hih nan laksawng pawl cu Pathian ih lungawinak le a cohlanmi raithawinak, a rim a thawmi rimhmui bangtuk an si," (Filipi 4:18) a timi thu in ka thinlung le ka khuaruahnak a tham nasa. A ṭulsam mi pawl bawm dingin khua kan ruah tikah, cumi cu thil ṭhazet a si ti'n kan ruat ringring – asilole cumi cu Khrih vekih hnaṭuannak a si, ti'n kan ruat ṭheu. Asinan Paul in mi pakhatkhat ih ṭulsamnak ah thinlung takih kan bomnak cu Pathian ih inn kha a lungawitertu rimhmui thawn a khatter thluh a si, a ti.   Midang pawl thluasuah dongtertu kan sinak, kan rinhmuinak in Pathian lungawitertu kan si thei ve. Amai' hmin in a ṭulsammi pawl hnenih thil ṭha kan tuahmi khi rimhmui bangtuk a si.   Tuni na kiangkap ah na ṭhatnak le na cangvaihnak a lo ṭulzettu an um maw? Nangmah a lo ṭulzettu mi pakhatkhat hnenah lo hruai dingin Pathian hnenah thlacam aw. Midang hrangah thluasuah si aw. Cumi cu a rim a hmuimi le na tuah hrimhrim dingmi cu a si.                                                                                                               Joe Stowell   Midang thluasuah pek cu Pathian thluasuah a si.