Pacific region ih "the Ring of Fire" tiih theihmi hmun ahcun linghnin cu an nasa ngaingai. Leilung pumpi linghnin zate ih 90% le leitlun ih linghnin tumbik cangmi ih 81% cu hih hmun ahhin a si. Ka theih daan vek asile Hong Kong ih inn tum pipi pawl cu granite parah an sak ti a si, ih cumi cun linghnin tikah innsiat mal deuh dingin a bawm an ti. Inn sangpi pawl ih hramthlaknak (foundation) cu leitlun linghnin tamzetnak hmun le ram pawl hrang ahcun a thupi hleice.   Jesuh Khrih in A dungthluntu pawl hnenah, minung nunnak saktuah tikah a hngetkhohmi hramthlaknak neih ding a thupit zia a sim hngai.  "Curuangah hih ka ṭongmi a thei ih a thluntu cu lungpi parih innsaktu mifim pa bangtuk a si. Ruah napi in a sur, ti a lian ih thlipi in a nuai ciamco na'n lungpi parih sakmi inn a si ruangah a sawn lo," a ti (Matt. 7:24-25). Jesuh Khrih, Lungpi parih nunnak hramthlak cu kan thlarau, kan thinlung le kan taksa nunnak hrangah atu hrangah le hmailam kumkhua hrang tiang daih in a hngetkhoh ringring a si.   Pakhat le pakhat kan pehtlaih awknak hrangah siseh, thuhrisahcatnak kan tuah tikah siseh, thil pakhatkhat ih co-u (priority) peknak kan neih tikah siseh, Bawipa ih fimnak thawih kaihhruainak cu leitlun nunnak dang khuihman ih kan hmuh thei dah lo dingmi a fekbikmi hramthlaknak a si ti fiang te'n kan thei a si.   Tirhsiang Bawipa, Nangmah cu kan Bawipa le kan Pathian na si. Vancung ih Siangpahrang na si, ka ruahsannak na hnenih bun dingin ka hril zo, ziangahtile Nang lawng hi rinsan tlak na si.                                                                                                               - Bill Crowder   Jesuh cu nunnak hnget neih theinak dingah hrambunnak ṭhabik a si.