Show notes
NITIN MANNA 2019 April 6 Zarhte Ni Lungpacal Bangtuk Zumnak Bawipa cu ka lungpi, ka ralhruang le i runtu a si. Ka Pathian cu ka beunak lungpi, ka ralphaw le ka rundam cahnak a si; Amah sung ahcun ka him. – Saam 18:2 Kan nupa in kum 100 luanmi pitar kan nei veve. Anmah le an rualpi pawl thawn thurel tlangnak ihsin ka hmuhsuahmi cu leitlun huap zikzik in kum upa pawl ih mizia a si: a liam ciami khuahlan ih harsat caan an vun mang saal timi a si. Tar pawl cun World War II le Great Depression thuanthu pawl an ciingkeng, ih cumi sanlai ih an harsat daan pawl, inn nei lo ih an um thu le college an kailai ah canned soup le pawnghmuk rimsia an rak ei thu pawl an rel thei ngaingai. Thukalhkeh zawngin, harsat buainak caan na tontehmi in na zumnak le na thlarau thazaang cahnak ah a lo bawm thei. Hih thil umtu daan ka hmuh fiangnak in Pathian thawn kan pehtlaih awknak sungih thuthup pakhat fiang deuh in ka thei thuk. Zumnak in rinsannak ih thusuhnak pawl a hminter. Ka zumnak lungpi a simi Pathian ka rinsan fek ahcun (Saam 18:2) a siavabik kiangkap thilcangmi khal in cuih kan pehzomnak cu an siatbal thei lo. Lungpacal vek zumnak cun atu laifangte ih kiangkap ticelcel le hnokbuaizet sung khal ah Pathian in ziangkim a uk thei timi zumnak in neihter thotho. Ka thinlung phurnak cu zianghman man nei lo sihmanseh, Pathian cu duhdawtnak a si ti ka zum hnget. Natnak cu cem ni a nei ih satan cu a cemnetnak ah nehnak a co dah lo. Lungpacal vek zumnak cun leitlun santhuanthu tluan ih thimkhawzing a rak tlun caan pawl ah siseh, Pathian Fapa an thah lai khal ah siseh, thuanthu zate sungih a tleubikmi cangvaihnak hrangah lo theih lo ih a ṭulmi – A thawhsaalnak le thihnak a neh ding thu a hmu thei. - Philip Yancey Ka himnak Lungpi Khrih cu ka ruahsannak umsun a si.
