Charlotte Elliott in thangṭhat hla (hymn) "Just As I Am" timi 1834 kum ah a ngan. Amah nu hi kum tampi taksa damnak famkim lozet ih umtu a si, ih cucing in nunau pawl hrangah cazirnak tlawnginn nei thei dingin sumsaw (fund) hawltu a si. Veikhat cu a dam lozet. Zianghman santlai lozet ah a ruat aw ih cuih a sunglam nun ih tuarnak cun Khrih sungih rinnak a neihmi a rinhlelhter. "Ka Si Bangin I Co" timi hla hi cuih rinhlelhnak a sungih ummi donak ah a nganmi a si. A thinharnak cu hih hlafang pawl in an langter hleice:   Ka si bangin san ka tlai lo, Lung sung natnak na damter ih; Nangmah lawng damtertu na si, Pathian Tuufa Na hnen ka ra!   A thi ih an phum hnu a nithumnak ah Jesuh cu thlaan sung ihsin a tho saal. Cule "Rinhlelhtu Thomas" tiih hminneitu pa hnenah lang in a kut thir ih an khennak hmaphe a thamter (Johan 20:27). Thomas cu Jesuh ih hmaphe pawl a tham ngah tikah a tho saal taktak ti a zum. Jesuh in, "Thomas, i hmuh ruangah i zum a si maw? Keimah i hmu lo na'n i zumtu cu mi thluasuak an si" a ti (c. 29).   Tuni ah Christian pakhat dinhmun in hmu lo na'n zumtu kan si. Asinan leitlun kan kiangkap in ka thlarau hrangih thusuhnak tumpi a neihter ṭheu. Cuvek caan ah, "Bawipa, ka lo zum; ka zum thei lonak hi in bawm hram aw" (Mk. 9:24) ti'n thlacam aw. Jesuh in kan sinak vekin Amah hnen pan dingah in sawm ringring.                                                                                                 Jenifer Benson Schuldt   Thosaal Khrih in na hrangah nunnak famkim na neih theinak dingah sangka a lo on sak.