Show notes
NITIN MANNA 2019 April 4 Tlawngkai Nili Duhdawtnak Thingkung Khrih in Amah ih taksa rori in kan sualnak cu thinglamtah ah a thlenpi zo ruangah kannih cu sualnak ahcun mithi kan si ih dingnak sungah a nung ding mi kan si. – 1 Peter 2:24 Kan hmuancar ah "the corkscrew willow tree" timi thingkung cu kum (20) lenglo lai a ding zo. Hih thingkung cu kan faale unau li pawl an nauhaklai ih an lehpannak a si ih kan innkiang ih cepa pawl hrangah an inn a si. Asinan ṭhaal caan a hung suak ih a thlatang zaanmang ihsin a hung ṭhangharh thei nawn lo tikah hau a ṭul taa. Zarh kar kharkhat ah nikhat cu cuih thingkung ah ka caan a cem – hmaisabik ah ka hautlu ih a hnge le a hnah pawl ka hleuh. Cumi in thingkung pawl ih thu tampi in ruatter. Thingkung hmaisabik thu ka ruat thok – Adam le Evi hrangah ei sian lomi thingkung ih thu (Seem. 3:6). Pathian in cuih thingkung cu ziangtluk in an rin-um, ziangtluk an rinsan timi hniksaknak ah a hmang. Cun Saam (1) sungih rah tampi a rahmi thingkung thu ka ruat. Cule Thufim 3:18 ih fimnak le nunnak petu thingkung thu tla ka ruat. Asinan phunmi thingkung thu hi a thupibik miangmo – Calvary ih thinglamtah (cross) cu a fekmi thingkung a si. Cuih thingkung parah in Rundamtu Bawipa cu lei le van karlak ah leitlun misual zate ih sualnak thilrit phurin thihnak a tuar. Cuih thingkung cu thingkung hmuahhmuah ih tlun ah duhdawtnak, raithawinak le rundamnak langtertu dingah hngetzet in a ding ringring a si. Calvary ah, Pathian ih Fapa neihsun cu camsiat thinglamtah ah thah a tuar. Cumi cu kan hrangah nunnak thingkung a si. - Dave Branon Khrih ih thinglamtah in minung ih sualnak pittawp le Pathian ih duhdawtnak maksak a langter.
