Awn celcel. Thir dumdo. Thawpit. Meisa hlumpi. Himi pawl cu Canada rammi thlapi par a kaitu Chris Hadfield in van tlolakpi sungih a fehnak ih a tontehmi pawl simfiangnak ih a hmanmi ṭongfang pawl an si. Rocket cu International Space Station umnaklam pan in a feh tikah leilung ih dirhnak tha (gravity) a ṭhang ih thawthawt a har deuhdeuh. Rocket sungah khingrit zianghman nei lo vekin a thei aw. Cuti'n zianghman thei aw nawn loih umlan si loin a hung hni.   Himi pa ih thusimmi pawl in ka nu ih in thihsanlai thu in vun ruatter saal. A nunnak ih thilrit in a nen deuhdeuh ih thawthawt theinak thazaang a nei nawn lo. A natnak ih anfah tuarnak a cem ih vanram ah zianghman thilrit um nawn loin a thleng. Jesuh hmaika a thlen zawng ih a hnih siamsi mithmai te ka ruah tikah ka lung a awi.   "Ṭha (Good)" kan timi tuni vek Tlawngkai Ninga ni (Friday) ahhin Jesuh ih nunnak cu thihnak in a tlunhnawh. Pa Pathian in Jesuh parah leilung mi hmuahhmuah ih sualnak – a liamcia, atu, a ralai dingmi – pawl a ret ih a thaw a thaw thei nawn lo. Cule hiti'n a ti, "Ka Pa, Na kut sungah ka thlarau ka lo ap" (Luka 23:46). Kan sualnak phurrit ruangih thawthaw thei lo ih a um hnu ah atu ahcun Pathian in Jesuh cu sualnak le thihnak ih huham um nawn lonak ah a umter. Amah a zum ih a ringtu hmuahhmuah cu Amah thawn kumkhua kan um dingih kan nunnak cu lungawinak le hnihnak in a khat ding.   Vancung ih um kan Pa, Fapa Jesuh in kan sualnak thilrit in phurh sakmi parah awkam ih sim thei lomi lungawinak kan nei a si.                                                                                                   Julie Ackerman Link     Jesuh ih raithawinak in vanram lungawinak in khihhmuh.