Cumi cu cabuai thawn a pehpar aw lo, ahlummi siseh, killi neimi siseh a poi lo. Tokham khal a thupibik lo – plastic asilole thing ih tuahmi a si khal ah a poinak a um lo. Cumi cu rawl khal a si fawn lo duhdawtnak thawn suanmi a si khal le. Rawl thaw ka timi cu TV le kan cell phone pawl kan phit ih kan sung te'n kan ei tlangmi khi a si.   Sungkim teih cabuai kiil tlang hi nuam ka tizet, ih rualpi le sungkhat unau pawl thawih chat aw ih thuhla phunkim rel tlang tla ka duhzet. Sikhalsehla, cumi cu tulai technology ṭhansonak in harsatnak a thlenh. A caancaan ah mai' innsang mi hnakin midang pawl kan pehpar deuh ṭheu – lamhla ih umtu pawl – thawn biak awk cu mai' innsungsang cabuai kiil tlang ih thunuam rel hnak in kan hril sawn.   Kan zate in Bawipa Zaanriah hmang tlang dingin kan khawm aw. Cumi cu kawhhran tum le fate khal a thupibik lo, minung tam le mal khal a thupi lo. Cumi cu pawnghmuk hmanmi ih pianzia thawn tla a pehtlai lo. Cumi cu kan khurkhua ruahnak le thinharnak pawl kan colhsan thluh ih Jesuh lawnglawng kan hmuitin (focus) tikah a si.   A netabik Bawipa Zaanriah na hman caan kha ziangtik a si taa? Pathian ih umpinak sungah lungawinak taktak tontehnak na nei maw asilole hmun pakhatkhat ih thilcangmi sungah na thinlung na bun? Himi hi a thupibikmi cu a si, ziangahtile "a tican cu hih sang nan ei tinte le hih khuat-hai nan in tinte Bawipa a ra kirlai hlan lo a thihnak thu nan phuang a si" (1 Korin. 11:26).                                                                                                               Keila Ochoa   Khrih ih thihnak ciinkennak in tuni hrangah ralthatnak in pe ih thaisun hrangah ruahsannak in neihter.