Ka rualpi pawl hnenah, nan nunnak sungih harsatbik nan ti caan, tontehnak naabik nan neih caan ziangvek caan a si, ti'n ka sut hngai. An thulehnak cu: raalpi huaisen lai caan, nupi pasal ṭhen awk caan, siizung ih surgery in tuah caan, duhdawt mi ih mual in liamsan caan, tivek pawl an si. Kan nu ih thuleh daan ve cu: "Hmaisabik fatir ka hrinlai caan khi a si," a ti. Asinan a ruat saal tikah lungawinak a si, "ziangahtile tumtahnak tumpi thawn nat tuar caan a rak si."   Jesuh in thinglamtah ih thah a si hlan deuh ah a dungthluntu pawl hnenah a nasazetmi harsatnak le riahsiatnak an ton ding thu a sim cia. Nu in faate a hrin zikte ah nasazet in a tuar nain nau a hung suah tikah harsatnak cu lungawinak ah a thlengh awk saal vek a si ding a ti (Johan 16:20-21). "Atu ahcun nan riah a sia, sikhalsehla ka lo hmu saal dingih nan thinlung cu lungawinak in a khat ding; cuih lungawinak cu zohman in an lo long thei nawn lo ding" (c. 22).   Kan nunnak ah riahsiatnak a thleng ṭheu. Asinan Jesuh cu "hmailam ih a co dingmi lungawinak kha a tumtahmi a si ruangah thinglamtah parih ningzah thihnak hman ziangah siar loin a tuar" (Hebru 12:2b). Thinlung sangka ong ih Amah a zumtu pawl hrangah ngaidamnak le luatnak a lei sak. A tuarnak in Pathian ih kumkhua hrang tumtah a simi Amah thawn kumkhua um tlang theinak lamzin in on sak.   Rundamtu ih lungawinak in tuarnak harsa a neh bangin Amah ih in pekmi lungawinak in kan tuarnak pawl cu a neh ve ding a si.                                                                                                               David McCasland   Tuarnak cu zumtu pawl Khrih in naihtertu a si.