British Pastor Joseph Parker cu "Ziangruangah Jesuh in Judas Iskariot cu a dungthluntu ah a hril?" ti'n thusuhnak a tong. Caan tawkfang thukzet in a ruat nain thulehnak a thei lo. Cumi hnakih ka thluak i buaitertu thusuhnak cu, "Ziangruangah kei i hril?" timi hi a si sawn, a ti.   Cuih thusuhnak cu kum zabu tluan ah mikip ih thusuhmi pakhat a si. Mi pawl in an sualnak a besiat zia an theih thuk tikah le sualnak ih a nehtuk tikah Jesuh hnenah a zaangfahnak co dingin an ttahhnawh. Khuaruahhar a simi cu Pathian in a duhdawt, an hrangah thihnak a tuar, ih an sualnak a ngaidam ti thutak an theih ih atak in an nunnak in an tonteh tikah an nunnak thlengh aw in lungawinak in a khat. Cuih thutak cu theih fiang harzetmi a si.   Kei khal thusuhnak ka nei, "Ziangruangah kei hi Jesuh in i duhdawt?" Ka theihmi cu sualnak khawthim sungah sual ka tuahnak cu thimnak in a khatmi ka thinlung ih forhfialnak in a si, ih cucing in Pathian cun in duhdawt hrih (Rom 5:8). Kei cu duh tlak lo, thinharnak ih khat, le bawmtu nei lo ka si, cucing in a duhdawtnak ttaang sungah um dingin a thinlung sangka in on sak thotho. A aw diimte ka thei, "Ka lo duhdawttuk, sual tuah na duhnak hnakih nasa sawn in," in ti.   Cumi cu thudik a si! Ka sualnak ka humhim. Ka palh ka ti duh lo. Cucing cun Pathian in i ngaidam ih zalennak i pek.   Ziangruangah kei cu? Cumi cu ka theih baanmi lengin a si. Asinain ka theih fiangmi cu Pathian in i duhdawt. Nangmah tla a lo duhdawt ve.                                                                                                               Dave Egner   Pathian ih in duhdawtnak cu zo kan si ruangah si loin Amah cu duhdawtu Pathian a si ruangah a si.