Hnaṭuannak ihsin inn a tlun phah ah Terry in a fahniang pawl hrangah laksawng te sum a duh. Airport ih gift shop hnaṭuantu in thilri mankhungmi pawl lei dingin a sim. Anih in, "Himi pawl lei thei dingin paisa ka nei lo," a ti. "Himi hnakih man mal deuh ka duh" a ti. Cazi pa in thilri man cu a ol pam ko sokhaw, a ti. Asinan Terry in a fahniang pawl cu ziangvek te khal a sum asile an lung a awi ko ding ti a thei, ziangahtile duhdawtnak thinlung thawn lei sakmi a si ruangah. A dik a si – a laksawng phurhmi cu an duh ngaingai.   Jesuh in Bethany khua netabik a ve tlawnlai ah Mary in a hnenah duhdawtnak langter a duh (Marka 14:3-9). Curuangah "alabaster thawl khat in a man a khungzetmi spikenard zihmui a lei ih a culh (c. 3). Dungthluntu pawl in thinheng in, "Ziangah thil a heukhau?" an ti (Matt. 26:8). Jesuh in a dungthluntu pawl cu Mary hnaihnok lo dingin a kham hngai ih, "Hi nu hin ka parah thil mawi a tuah a si," a ti (Marka 14:6). Jesuh in a laksawng pekmi parah a lungawi, ziangahtile cumi cu thinlungtak ih duhdawtnak ihsin pekmi a si ruangah. A thihnak ding hrangih hriakculhmi a si ko nain mawi a ti thotho.   Jesuh na duhdawt zia nang teh ziangti'n na langter ve ding? Na tikcu caan, na thiltitheinak, na hlawnthil? Thilri mankhungzet ti tengteng a ṭul lo, midang pawl ih theih sak le soiselnak khal poisa ding a si lo. Na thinlung sung ihsin a suakmi duhdawtnak taktak thawn na tuah sakmi a si ahcun cumi cu Jesuh hrangah a mawibik a si.   Bawipa, Na tuarnak hrangah zianghman ka lo pekir thei lo. Asinan a mawi na ti dingmi ka thinlung le ka lungawinak tuni ah ka lo pe a si.                                                                                                             Annie Cetas   A harhdammi thinlung cun  Jesuh a duhdawt.