Caan khat hnu caan khat, mi tampi anmah le anmah upat ṭihzah ding tlakih an ruah awk tlukin mi ih hmaizah an ton lonak thu pawl kan siar ttheu. "Zo ka si ti in thei maw?" ti'n thinhengzet in an aukio ciammam. Cule "Midang hnenah zo ka si?" ti'n a sim asile nangmah le nangmah na ruah awk vekin na si lo," ti'n an simmi in ralrinnak in pe. Hih theih lonak ruangih mah le mah thupituk ih ruah awknak thawn a linglet awmi nun daan cu Jesuh ah kan hmu thei.   Jesuh cu Jerusalem ih a luhlai ah mipi in an thangṭhat (Matt. 21:7-9). Khua sung  ih umtu pawl in, "Himi pa hi zo a si?" tiih an sut tikah, "Hi pa cu Jesuh, Galilee ram Nazareth khua mi profet a si" (cc. 10-11) an ti. Amah cu caan ṭha remcang ngah dingin a ra lo, tangdor in a Pa ih duhmi tuah dingah thungainak thawn a nunnak pe dingin a ra.   Jesuh ih simmi thu pawl le thupekmi pawl cu upat tlak an si. An dinhmun a humhim lomi leitlun uktu pawl vekin Jesuh cun midang pawl kha Amah ttihzah upat dingah a fial dah lo. Retheinak nasatak a tuarlai caan cu a nunnak dinhmun a niambik, a ṭonṭaihbik le a sunbik caan a si. Cucing in nunnak kan ngah theinak dingah a sinak, a cahnak le a mission cu a thimbik caan ah thihnak tuar in a ttuan.   Tuni ah Jesuh cu nunnak pe ih biak tlak a si zia na thei fiang zo maw?   Bawipa, Na tangdornak, na cahnak le na duhdawtnak sungah i umter. Mah le mah thupizet ih ruah awknak in i baangter. Ka thinlung sungih ummi, mai' zawn lawng ruahnak i thlengh sak hram.                                                                                                                                                             David McCasland   Jesuh na hmuh ngah ahcun nangmah kel na si lo ding. – Oswald Chambers