Crunch. Crunch. Whoosh! Zuknung (film) an tuah pektelai ah, Foley artists in thuanthu cawn tuahmi bawmtu dingah awn (sound) an rak sersuak. Vur tlakmi awn, vate thlazaap awn le awn phunkim suaktertu thilri pawl an tuah. Movie an zukmi kha atak vek a si theinak dingah hih kutthiam pawl in awn-deu (fake sound) tampi an tuah.   Awn pawl vekin thuhla (message) pawl tla amah vek cekci (replicate) tuah a theih ve. Satan ih hmanmi hriamhrei pakhat cu thu kha thlaraulam ih ṭihnungza ah a cantermi hi a si. Paul in 2 Korin. 11:13-14 sungah, "Annih tla cu tirhthlah taktak an si lo, tirhthlah deu an si. An hnaṭuanmi thu ah thuphan an per ih Khrih ih tirhthlah ngaingai bangin an ti awter. Cumi cu mangbang ding zianghman a um lo; Satan hman in tleunak vancungmi bangtuk in a tuah aw thei a si" ti'n ralrinnak in pek. Paul in zirhtu sual pawl cun Jesuh Khrih le A zaangfahnak ihsin kan khuaruahnak pialter ding an tum ti in theihter.   Jesuh in Thlarau Thianghlim ih in umpi duhsannak thu pakhat in simmi cu: "Sikhalsehla Thlarau Thianghlim a run tik ahcun Pathian thutak langtertu a si ruangah thutak hmuahhmuah ah a lo hruai ding" ti a si (Johan 16:13). Thlarau Thianghlim ih bomnak le khihhmuhnak thawngin bumnak hlir ih a khatmi hih khawvel ahhin thutak ih humhimnak kan hmu thei ding a si.   Kan lo ttul, Thlarau Thianghlim, a palhmi sung ihsin thutak thei thei dingih in bawmtu dingah! Midang in asilole kanmai' thinlung lala in ol te'n bum theih mi kan si. Zin peng ah hloral lo dingin Na hnen ihsin zir dingah kan thinlung sangka in on sak hram aw.                                                                                                                                                                                     Bill Crowder   Thlarau Thianghlim cu in umpi ringringtu Zirhtu a si.