Ka pa in kum 90 a kim ih a simmi cu hminsin tlak taktak a si: "Ka thih tikah Kawhhran siar lo zohman in zianghman an tuah lo pei. Khuahlan khuazing dang kan rak biaklai ih raithawinak le thlacam ti pawl zianghman nan run tuah hrimhrim lo pei. Ka nunlai ih Jesuh Khrih ka biak bangin ka thih tik khal ah a si ding," tiah a ti.    Jesuh Khrih cu i Rundamtu le ka Bawipa tiih a zumfek hnu ah Khrih ih lamzin lawng thlun dingin a hril. A rualpi pawl in an hmuhsuam: "Nang vek putar Biakinn feh ih khawm tum ve?" ti'n. Asinan ka pa cu a nungmi Pathian a zum hnget ih Amah lawng bia dingin duhhrilnak felfai a tuah, Joshua ih a sawmngiarmi Israel mipi pawl vekin!   Joshua in mipi pawl cu: "Tuni ahhin zo kan rian ding timi felfai te'n hril uh," ti'n a sawmngiar. "Kei le ka innsang cun Bawipa kan biak ding a si," a ti (Joshua 24:15). Israel mipi ih thulehnak hi lungawi a umzet – Bawipa lawnglawng kan rian ding, ti'n an hril ve. Joshua in Pathian ih thianhlim zia, le thiik nei Pathian a si zia tampi a sim hngai ih Amah riantu si ding cun aman pek ṭul a tum zia a sim (c.19, 20). Israel mipi cun Bawipa lawng kan thlun ding, Amah ih runnak, humhimnak le cawmnak pawl ruangah, an ti (cc. 16-17, 21).   Sihmansehla, cuvek ih rin-umzet duhhrilnak tuahnak cun rin-umzet ih cangvaihnak neih ding a dilngen ve a si. Joshua in nasatak in ralrinnak a pek: "Cuti asile nan lakih a ummi ramdang pathian lem pawl cu hlon thluh thlang uhla Israel ih Pathian Bawipa hnenah nan thinlung cu pe thluh uh," tiah a ti (c. 23). Nang teh Pathian hrangah nung dingin duhhrilnak fekfel na tuah zo maw?                                                                                                   Lawrence Darmani    Duhhrilnak felfai in Cangvaihnak felfai a dilngen cih.