Kum upa pitar pahnih ka vehvai cingcing. Pakhat cu sumsaw thuhla ah zianghman thinharnak a nei lo, amai' inn te ah a um. Asinan thil pakhatkhat parah a ṭha lo (negative) lam in thu a sim thei ringring. Pakhat deuh cu dam cak lemlo le thu hngilh hmangzet a si. Apartment ah a um, hminsinnak cabute a tuah ih appointment a neihmi pawl a hngilh dah lo. Amah ra leengtu pohpoh hnenah ṭongfang pakhat bangrep te'n a sim hringringmi cu: "Pathian cu ka parah a tthatuk" ti a si. Netabik ka va leen ttum ah a mizaan vekih a nganmi cu: "Thaisun suncaw ei hlanah! Mangbangza! Lungawiza ni a thleng ding!" ti a si.   Anna cu Jesuh ih suah caan ah profet a si ih a umnak kiangkap hi harsat caan a rak si (Luka 2:36-37). A pasal in tuan te'n a thihsan, fanau a nei lo a bang, ih ninghang riahsia ih um ringring ding a bang. Asinan a hmuitin cu Pathian hnen lawng ah a bun ih a ti thei tawk te'n a rian. Messiah rat ding ni rin-umzet in a hngak. Asinan Pathian hnaṭuan in man caan a nei lo nasa, thla a cam, rawl a ul ih midang pawl hnenah Pathian hnen ihsin thutak a zir ngahmi pawl a sim.   A ni netabiklam caan a thleng – kum sawmriat lenglo a si tikah – Messiah cu a nu Mary ih ṭaang sungah a mit rori in a hmu ngah. Thinsau lungfual ih a hngah reromi cu manhla a ti ngaingai. Lungawi thinnuamzet in thangṭhat hla a sak thei. Pathian a thangṭhat ih midang hnenah lungawinak thuthangṭha a sim vingvo.   Bawipa, phunciartu i siter hlah. Lungawithu simtu i siter hram aw.                                                                                                               Marion Stroud   Pathian khuakhan le Kanmah lam ih tuah ding theih a har. Asinan an ton awknak hmun cu a tthabik a si.