Kan fale pawl an nauhak lai ah siibawi hnen fehpi khi thinlung sungah a taangzetmi hmuhtonnak a si. Hngahnak khaan sungah umhar loih an leh theinak ding nauhak leknak ding zuk (toy) tete in a khat, siar dingmi nauhak thuhla nganmi magazine an ret ih ka siar sak hngai. Curuangah reipi hngah khal a buai lemlo. Asinan appointment ih ka hruai cingcing tikah thil umtu daan a rak thlengh danglam ṭheu. Hmakhat te'n hnihnak cu ttihnak ah a cang, ziangahtile sii sayama (nurse) cu sii dawt dingin ṭhim thawn in ra naih ruangah. In naih deuhdeuh ih ka hngawng in in deek. Ka parah an kai, an luat theinak ding an ruahsan ih, an damnak dingah ti an thei lo.   A caancaan ah hih a tlusia zomi leilung tlun ih kan umlai ah thlangam daihnak le dai teih umnak ihsin harsat buainak hmun le caan kan thleng ṭheu. Cuvek caan ah thusuhnak a ummi cu, "Ziangti'n ka hmason ding?" timi hi a si. Ttih le khur le mangbang vansang in Pathian in ziangruangah hivek in tuarter si pei, asilole cuvek buainak kan tonlai khal ah Amah kan rinsan thei, kan hrangah pakhatkhat in tuahsak ko ding ti'n thlangam te'n kan um thei. Harsat buainak kan ton caan ih tiṭhatu kan si theinak dingah Saam cangantu ih simmi hi ciingkeng ringring uhsi: "Ṭihphannak ka neih tikah, Maw Ziangkim tithei Bawipa, Nangmah ka lo rinsan a si" (Saam 56:3).   Ka fahniang pawl bangin, harsatnak a nasa deuhdeuh tikah Pathian naih deuhdeuh in fek deuhdeuh in pom hnget ding kan si. Pathian cu na thinlung takin rinsan aw, A duhdawtnak cu kumkhua a hmun a si.   Bawipa, ra awla in bawm aw. Harsat caan ah lo rinsan in thiamter aw.                                                                                                               Joe Stowell Vancung ih a ummi na Pa hnenah pan mai aw, Amah cu na hrangah ruahsannak umsun a si.