Norway ram ih Rjukan khua fate cu umnak ding hmun nuamzet pakhat a si – thlatang (winter) caan ih khuathim caan siar lo ahcun. Cuih khua cu Gaustatoppen Mountain hram ah ummi a si ih kum hrek sunglai cu direct in Nitleu a dong ngah lo. Khua sung mi pawl in caan reipi an ruahmi cu tlangzim ahkhin thlalang tumpi ret sehla cumi ihsin Nitleu in run tletsin (reflect) sehla ti a si. 2005 kum ah khuasung mi thilthiam mi pakhat in "The Mirror Project" timi a thok ih mipi pawl kha cuih tumtah atak ih hlensuah thei dingah tel cio dingah a sawm. Kum (8) a rung rei hnu 2013 kum October thla ah thlalang ihsin Nitleu hmu dingih zuamnak cu atak in a cangsuak thei tariai. Khua sung mi hmuahhmuah cu town square hmunpi ah cuih thlalang sung ihsin an hnenih a run tletmi Nitleu hawp ngah ve dingin an suak ciamco.   Thlaraulam daan in vun ruah thuk tikah leitlun hmun tamsawn cu Rjukan khua vek an si – harsat buainak tlang sang pipi pawl in Jesuh ih tleunak hmu thei lo dingin a pheen thluh. Asinan Pathian in Amah zumtu a fahniang pawl hi A Fapa Jesuh ih tleunak kha midang hnenih tletsintu pawl si dingah hmuntin ah in ret a si. Cumi sungah Tipil petu Johan (John the Baptist) hi mi nasa pakhat a si, ziangahtile thihnak phenthlam tangih a ummi leitlun misual pawl hrangih tleunak petu Jesuh ih tleunak langtertu tetti a si ruangah.    Nitleu cu minung taksa le thinlung nun damnak hrangah lo theih lo ih ttulmi a si vekin, Jesuh ih tleunak cu kan thlarau nunnak hrangah kan ttulbikmi a si. Lungawiza cu zumtu pawl cu hih leitlun thimnak khawvel ah Jesuh ih tleunak kuatsintu ding kan si.                                                                                                                                                                         Julie Ackerman Link   Thimnak sungih a ummi khawvel in Jesuh ih tleunak a ṭul.