2013 kum ah, Philippines ram Tacloban khua cu a tha a cakzetmi typhoon thlisia ih a nuai ciamcolai ah mi 10,000 lenglo an thi ding ti'n an zum. A nung ih a rung taangmi pawl khal umnak ding inn le lo nei loin le hnatuan ding nei loin an um. Lo theih lo ih an ṭulmi a tam ngaingai. Thla (3) a rung rei hnu ah khuapi siat ti celcel lakah ruahsur le thli hrang lakah lamzin kap ah naute pakhat cu hrin in a um. Nikhua sia cu a reh thei lo, innsang mi pawl cu naunei bawmtu midwife an hawl ih naute le a nu cu siikhan (clinic) ah an fehpi. Naute cu a hung upa vingvo ih harsat caan ih ruahsanmi laksawng ah a hung cang.   Israel mi pawl kum (40) sung Filistin pawl ih namneh an tuarnak hi an miphun thuanthu sungah an harsat nasabik caan a si. Culaifang ah vancungmi in Israel minu pakhat hnenah fapa hleice na nei ding, ti'n a sim (Thuṭhentu 13:3). Vancungmi ih sim vekin naute cu Nazir – Pathian hrangih ahleice retmi a si ih amah cu Filistin mi kut sung ihsin Israel mi runsuak dingah a thoktu a si (c. 5). Naute Samson cu harsan caan ih ruahsannak laksawng (gift of hope) a si.   Harsatnak le buainak cu hrial a theih lo, asinan Jesuh Khrih in cumi sung ihsin runsuah theinak dingah huham a nei. Khrih cu thimnak sungih a ummi pawl le thihnak phenthlam sungih a umtu pawl thlangam daihnak sungih feh thei dingin lamhruaitu tleunak a si.   Bawipa, ka umnak hmun ihsin a lenglam ih thil ummi pawl hmu thei dingin i bawm awla ka ruahsannak cu Nangmah sungah umter aw. Huham le thuneihnak zate cu Nangmai' taa an si. Na tthatnak i theihter aw, cule Na duhdawtnak sungah i cawlter hram aw.                                                                                                                                                                         - Jennifer Benson Schuldt   Jesuh cu nunnak ih thlisia daitertu ruahsannak a si.