Thuṭhentu hmaika ih a dinlai ah thuṭhen tuarmi nu/pa cu thuṭhennak zung ih zaangfahnak tangah a um. Mawh nei lo a si an ti ahcun thuthennak zung cu beunak a si. Asinan misual tiih thutlukter a si ahcun thuthennak zung cu cawhkuan peknak hmun ah a cang.   Thukam Hlun Nahum Cabu sungah Pathian cu beunak khal a si ih thuṭhentu khal a si ti kan hmu thei. "Bawipa cu a ṭha, harsat caan ah beunak ṭhabik a si" (Nahum 1:7). Asinan hiti'n tla a sim, "Tilian in thil a siatsuah bangin, a ral pawl cu a siatsuah ih, a dodaltu pawl cu thihnak khawthim sungah a thlak hai" (c. 8). Ahlan kum (100) lai ah, Nineveh khua cu Jonah ih thusimmi ruangah an sual an sir ih Pathian ngaidamnak co in an himdam (Jonah 3:10). Asinan Nahum sanlai ah, Nineveh cu Pathian dodaltu a si (Nahum 1:11). Bung 3 sungah Nahum in Nineveh ih siatralnak thu cipciarzet in a sim.   Mi tampi in Pathian ih minung a pehtlaihnak thu ah a khatlam kau lawng an thei ih a khatlamtu sawn cu an theithiam lo. Annih cun Pathian cu a thianghlim ih thuṭhen ding a duh, asilole Amah cu zaangfahnak in a khat ih a ṭhatnak kan parah a langter ding ti lawng an ruat. Thutak cu: Amah cu thuṭhentu a si ih beunak khal a si. Peter in Jesuh thu hiti'n a ngan, "Mi in an hmuhsuam tikah a hmuhsuam ve lo; harsat a tuar tikah hro a suang lo. Sikhalsehla a dingthluk lairelnak thawn thu a thentu Pathian sawn a rinsan a si (1 Peter 2:23).   Pathian Thutak a zate cu thuthang ṭha (good news) a si. Amah cu thuṭhentu asinan Jesuh ruangah A hnenah beunak kan hawl thei.                                                                                                               Dave Branon   Pathian ih dingnak le zaangfahnak Cross ah an tong aw.