Kan ram ih tubaite hril awknak ah mi harsa naunei pek nu pakhat cun a vote pek ding cu diapers thuk khat in a thlengh mai ti ka thei. Ram hruaitu dingah vote pek dingmi pawl ih thuhla pakhat cio kan ruah awk tikah cu nu ih duhhrilnak a tuah daan in ka thin i hnaihnokter. "Asile ziangmi si na theih fiangmi?" ti'n thu ka sut. Cu nu cun dai te'n i umsan men. Thla ruk hnu ah vote a pekmi pa cu hril awknak ahcun nehnak a co. Siahkhon (tax) pek ding a saangter. Atu ahcun thilri ziangkim ih an man a kai thluh, diaper man tla tel in!   Leitlun ram tinkim ah ramkhellam ih siatralnak cu thil thar a si lo. Cuvek ṭhiamṭhiam in thlaraulam ih siatralnak khal hi thil thar a si cuang lo. Satan in Jesuh cu a thlem nasa (Matt. 4:1-10). Sualforhtu cu Jesuh a rilrawnzet laifang ah a ra thleng. Hmakhat teih pumpuar daan ding a sim, ei ding rawl ngah lohli daan, mangbangza runsuah ding daan, le hih leitlun sunlawinak pe dingin, tivek in.   Asinan Jesuh cun a thei sawn. Lamzintawi zawh cu ṭihnungza raal a si. Tuarnak um lo lamzin nuam zawh dingin mi an leem, asinan a netnak ih tuar dingmi cu ruah ban leeng in a har. "Ca Thianghlim in a ti," ti'n Jesuh cun a vei thum te'n a let (Matt. 4:4, 7, 10). A theihmi thutak Pathian hnen ihsin a rami Ttongkam parah a ding hnget.   Tukforhnak kan ton tikah, Pathian in in bawm thei ve a si. A parah kan hngatsan thei ringring ih A Ṭongkam thutak in ṭihnungza lamzintawi thlun mai lo dingin in hrialter thei a si.                                                                                                               Keila Ochoa   Pathian ih lamzin thlun cu a ol lo, Asinan kumkhua diriamnak hmun ah mi a hruai.