-3        Tunai ah ka nupi Marlene le kei in kan fapa le a nupi hnen ihsin thinlauza telephone kawh kan dong. Zaan ah an inn sungah palap pahnih an hmu. Palap pawl hi rannung pawl lakah ziangvek an si timi cu mallai ka thei, asinan Pathian ih sersiammi pawl lakah ka uarmi vate an si lo, ahleice in inn sungih a zuang ciamco tikah.   Kan nupa cu kan fahniang teih inn ah va leeng in kan va bom ngah ruangah kan lungawizet. An inn sungah an hmuah lomi mikhual pawl lut nawn lo dingin a ong pawl phih daan ding kan va simzirh.   Kan nunnak ah kan hmuah lomi mikhual cu in hnaihnoktu harsat buainak hi an si. Harsatnak kan parih an thlen tikah, kan thin a cem ih kan thin a phang. Asinan hih harsat buainak pawl hi duhdawttu Pathian in Khrih kan bang theinak dingah kan nun in tuahṭhatnak ih a hmanmi ah an cang ṭheu. Curuangah Jeim in, "U le nau pawl, nan hnenah hniksaknak a phunphun a thlen tikah mi vannei kan si tiah ruat aw uh, ziangahtile nan zumnak in cubangtuk hniksak harsatnak nan neih tikah tuar theinak a ra, ti nan thei. Tlaksamnak zianghman um loin a famkim le a pitlingmi nan si theinak dingah a net tiang a tuar theitu si dingah zuam uh," a ti (cc. 2-4).   Hniksaknak le buainak ah lungawi ding tinak cu a si lo. Asinan hih mikhual a thlen tikah Pathian ih kut-cak kan zoh thei, ih A Fapa kan bang theinak dingah a hmang thei, ti hi rinsan ngam uhsi!                                                                                         Bill Crowder   Hniksaknak kan hnenah a ra thleng ṭheu ding, Asinan Pathian kan hnenah a um ringring.