Charles Ponzi ih hmin cu kumkhua in sumsawlam ah dik lo ih tawlrel in a nunnak a khaisang tum timi thawn a kop aw ringring ding. Sumsaw thu ah dik loin a cangvai ih thawnginn sungih caan tawite a um hnu ah 1920 kum thok ah investor pawl hnenah an sumsaw retmi ih zatek 50% cu ni (45) sungah a khirh saalnak a thok ih 100% cu ni (90) sungah a khirh thluh. Cuti vekih a tuah cu a ti ṭhazet khi a bang. Ponzi in a paisa cu sumsaw khawltu thar (new investor) pawl hnenah co-u (priority) pe in siangzet in a hmang ih fund a hawl. A thilti dik lonak an kaih ngahnak August 1920 ah invest tuahtu pawl in 20 million dollar an sungih bank 5 pawl cu an sung thluh. Ponzi cu kum thum sung thawng an thlak ih neta ahcun Italy ram ah an dawi ih 1949 kum, amai' kum 66 ah paisa pia khat hman nei loin a thi.   Thukam Hlun ih Thufim cabu in mifim ih hminthannak le mi-aa ih nun daan pawl tampi a tarlang cingcing. "Mi ṭha pawl ciin ringring hi thluasuah a si, asinain mi ṭha lo pawl ih hmin cu a ṭawtruai ding." "Miding pawl cu an himdam ih hnangam tein an um, asinan miding lo pawl cu mi in an thei ngah ding" (Thufim 10:7, 9). Solomon in a khaikhawm ih, "Lennak hnakin hmin ṭhatnak hril ding a si sawn. Zaangfahnak cu sui le ngun hnakin a ṭha sawn" a ti (Thufim 22:1).   Mi ṭhatnak kan hawl, cumi cu kanmah le kanmah sunloih aw dingah si loin kan Bawipa Jesuh Khrih ih hmin cu hmin hmuahhmuah lakih hmin sunglawibik a sinak langter ding le sunloih dingah a si.    Bawipa, Na hmin sunloihtu ka si theinak dingah Nangmah rinsan in Na lamzin dik thlun ngamnak thazaang le ralṭhatnak in pe hram.                                                                                                   David McCasland      Hmin ṭha in a maksakmi