Show notes
NITIN MANNA 2019 March 15 Tlawngkai Ninga Pathian in A Ngai Zingtin ka thlacamnak cu na thei, Ni a suah tikah ka thuhla cu Na hnenah ka thlenter; cule Na thulehnak hngak in ka um. - Saam 5:3 1982 kum ah The Today Show timi TV program in Billy Graham interview an tuah. Cumi ni hlan nikhat duh ah a director pa Larry Ross in ṭuanvo neitu pawl hnenah, interview hlan ih thlacamnak dingah Billy Graham hrangah innkhan (private room) tuahsak dingin dilngennak a nei. Asinan Billy Graham studio ih a ra thlen tikah amah bawmtu pa in Larry Ross hnenah, Billy Graham in thlacamnak khan a ṭul nawn lo, a ti. A simmi cu, "Mr. Graham cu zing a thawh ve te'n thla a cam zo, thawhhlam a ei zawng ah tla a cam zo, lamzin tluan motor car sungah tla thla a cam rero zo, ih interview an tuah sung khal ah thla a cam rero ko ding," ti a si. Ross in netalam ah, "Cumi cu mino dinhmun in ka zir ngahmi fimnak maksak a si," ti'n a sim. Thlacam nun nei timi cu tikcu caankhiah pakhat sungih cangvaihnak a si lo; thlacam nun nei timi cu Pathian thawn pehtlaih awknak neih ringring hi a si. Pathian thawn neel awzet ih pehtlaih awknak nei timi cu Pathian minung pawl in nitin nun daan life style ih neih khi a si. Saam Hla ngantu in thazaang in pekmi cu nitinte hi Bawipa hnenih thlacamnak thawn hramthok ding a si (Saam 5:3); zing-sun-zaan in Pathian hnenah thlacam ding kan si (Saam 55:17); dodalnak kan ton caan ah cat baang loih thlacam ding kan si (Saam 109:4). Thlacam cu kan nitin nun daan ah canter ding a si, ziangahtile Pathian thawn um tlang ringring cu kan saduhthah a si (Saam 42:1-4; 84:1-2). Thlacam cu kan nunnak ziangvek caan khalah Pathian thawn kan pehzom awknak lamzin a si. Pathian cun kan aunak aw in ngaisak ringring. Ziangtik caan khal ah Amah cu kan bia thei ringring a si. - Marvin Williams Thla na cam tikah Pathian in na ṭongmi hnakin na thinlung sungih au-aw a lo ngai sak sawn.
