Mipi pawl tlang hram ah dingin, an kiu le kiu dai aw in ṭih le khur ih an um ding khi vun ruat hnik. Ṭektla le khawdur lakah khua a ri ih nimthla a kau zukzo; mero sahzet a um ih tuucangki ringzet ih tummi aw a thang. Tlang hmuahhmuah cu meikhu in a tuam ṭheh, ziangahtile Bawipa cu tlang parah meisa in a rung ṭum. Meikhu cu cahmang meikhu vekin a kai ih Sinai tlang pumpi cu a hnin durdo. Moses a ṭong tikah Bawipa in khuari in a run let (Suah. 19:16-20).   Israel mi pawl in Sinai tlang kiang ah hi bangtuk ṭihnung raapthlakza tontehnak an neih caan ah Moses hnenah zaangfah an dil, "Nangmah in thu in sim awla kan thei ding; asinan Pathian cu kan hnenah thusimter hlah aw, kan thi thluh pang ding," an ti (c. 19). Israel mipi cun Moses cu Pathian le anmah karlak ih palai ttuan dingin zaangfah an dil. Curuangah mipi cu tlang hram hmun hla deuh ah an dingih Moses lawng Pathian hnenah naih te'n a va feh (c. 21). Pathian thawn an ton awk thluh hnu ah, Moses in Pathian ih thupekmi pawl cu tlang hram ih mipi pawl hnenah a run kengih a sim hngai.   Tuni ah kan biakmi Pathian cu Israel mi pawl in ttih le khur ih an rak biakmi, Sinai tlang parih a maksaknak a rak phuanglangtu Pathian nung thotho a si. Pathian cu a thianghlim famkimmi a si ih kannih cu sualnak ih khat kan si ruangah Amah thawn kan pehzom aw thei lo. Asinan Jesuh in Pathian hnenih kan naih theinak dingah in tuah sak, kan sualnak in laaksak ih Amah in a phur, thinglamtah parah a thihpi, ih thihnak neh in a tho saal (1 Korin. 15:3-4). Atu khalah Jesuh cu a thianghlimmi famkim Pathian le misual kanmah pawl karlak ah palai dinhmun in laak sak a si (Rom 8:34; 1 Tim. 2:5).                                                                                       Jennifer Renson Schuldt     Jesuh in Pathian le kanmah karlak ah lilawn a don.