Phunli Tlawng (elementary school) ka kailai ah ka rualpa Kent le kei cu zaan ah German ram tuah durbing (binoculars) hmang in van parih arsi pawl zoh in caan kan rak hmang ṭheu. Van ih Arsi (star) pawl le Thlapi (moon) parih tlang pawl kan zoh tikah kan mang a bang ngaingai. Kan rualtu in zaan ih khuavar "Durbing (telescope) i pe aw," kan ti aw rero.   Kum zabu tam nawn reilai ah Judah mi tuukhal tlangval pakhat cu zaan ih a tuurual pawl an ihthah caan ah van ih arsi pawl a zoh ih a mangbangzet ve. Anih cun tuihsan vekin fiang deuh ih hmuh theinak dingah bawmtu thilri: durbing (binoculars) le telescope hman ding a rak nei ve lo. Asinan anih cun a thupi sawnmi thil pakhat a nei – cumi cu a nung Pathian thawn pumpak ih pehtlaihnak a nei. Na mitthlam ah tuurual tampi kiang ah David cu van ih arsi pawl a hun zoh daan ding khi ngaihtuah hnik! Netalam ah mi tampi thinlung nehzettu biazai maksak a run ngan: "Van pawl khin Pathian sunlawinak an sim ih, tlolak kaupi cun a kutsuak an langter. Sun in sun hnenah thu a sim ih, zaan in zaan hnenah theihnak a thlenter" (Saam 19:1-2).   Tusan cu hnatuan tamzet ruangah man ti nei loin, buaizet (busy) in caan kan hmang ih Sersiamtu Pathian in a sersiammi minung pawl hrangih in timtuah sakmi, kan lungawinak ding le A sunlawinak langter dingih a tuahmi van arsi le thlapi ih mawinak pawl zoh dingah tikcu caan kan pe man thei lo. Kan tikcu caan sunglawi pe in zaan caan ahkhin van ih arsi le mangbangza sersiammi pawl zohnak ah kan hmang asile Pathian le kumkhua a hmunmi a huham le a sunlawinak thuk deuh ih theih theinak kan nei ding a si.                                                                                                               Dennis Fisher   Mangbangza sersiammi pawl sungah, Pathian sunlawinak le a mizia kan hmu thei.