Drew cu kawhhran tumpi pakhat ah thathozet in a veikhatnak hla a hruai rero. Lois timi caan reipi rak khawm zotu in thapek a duh, asinan mipi hmai ih tong awk dingah caan remcang ngah ding a har. Asinan mipi lak ihsin a ti-daan ding lamzin a hawl ngah. Lois in Drew hnenah, "Pathian Biakkhawmnak ih na thathawh zia ka hmuh tikah ka lo uarzet. Catbaang loin Bawipa cu rian ringring aw," ti'n tha a pek.   Lois cu thla tamnawn a hmuh nawn lomi Sharon a hmuh tikah a hnenah a va tlan. Mallai an biak awk hnu ah Sharon in, "Bawipa hrangih na hnaṭuanmi pawl ka theihmi parah ka lungawituk. Pehzom in Bawipa cu rian sinsin aw," a ti. Mi thapetu Lois cu thapek a si ve.   Ruth le a ninu Naomi cu Moab ram ihsin Israel ram ih an kir hnu ah an ruah baan lomi thluasuah an dong. Nuhmei veve bawmtu nei lo an si, curuangah Ruth cu Lo ah a feh ih rawl ttuantu pawl ih dunglam in a feh ih an hrelhmi faanglep a hawl (Ruth 2:2-3). Ruth ih a fehnak Lo neitu cu Naomi ih sungkhat unau Boaz a si. Ruth cu a hminsin ih a ṭulmi pawl a bawm, ih neta ah a nupi ah a rung cang (Ruth 2:20; 4:13). Ruth in thluasuah a dong, ziangahtile amah cu tikcu caan remcang le hmun remcang ih a um thiam ruangah a si (Ruth 2:11-23).   A caancaan ah Pathian in rinlopi ih kan hmuhtonmi pawl kha ruah baan lomi thluasuah in peknak ding hrangah a hmang ṭheu.   Bawipa, midang bawmtu si dingin i bawm aw. Ka thinlung cu mi bom duhnak in khatter aw. Na kut le na ke ah i hmang aw.                                                                                                   Annie Cetas   Midang bom cu thluasuah donnak hrampi a si.