Ka pasal Jay le keimah in innsang sungtel thar pakhat – thla (2) a kimmi zawhte Jasper kan nei. Jasper him teih a um theinak dingah innsung ih saangkaa pawl ong in kan taan ṭheumi kha kan khar thluh. Asinan kaika ṭum-kainak lamzin cu khar a theih lo ih ong pakhat a taang. Zawhte cu parkai an paihzet. An fatetlai ihsin ttum le kai an paihtuk. Curuangah tangta khaan ih keimah thawih kan um tlang caan ah inn tlun kai ding lawnglawng a tum. Ka kiangte ih umter ka zuam rerolai ah i ra hniksak. Sangka kan tuahmi cu nauhak le uico hrang ahcun a ṭhahnem na'n zawhte hrang ahcun a ṭhahnem lo.   Zawhte luh-suahnak ding sangka (gate) thuhla ih harsatnak kan tonmi in ka khuaruahnak sungah Jesuh in amah le amah kha, "Kei cu sangka ka si" (Johan 10:7) tiih tahṭhimnak a hmanmi i vun ruatter. Nisuahnaklam Ramlaifang (Middle Eastern) pawl ih tuurual pawl cu an riahnak tuuinn ah saangka pakhat an tuah ih an on sak ringring. Zaan ah, tuu pawl humhim teih tuu inn sungih an um theinak dingah tuukhal cu tuu sangka rori ah it tahrat in a kil. Curuangah tuu siseh, tuu pawl hnaihnok ding le fir tumtu pawl cun tuukhal an pahtlang taa hmaisa lo ahcun tuu inn sungah an thleng thei hrimhrim lo.   Kan zawhte Jasper ka kilhim tum rero nain keimah le keimah cu zawhte fehnak sangka si ding cu ka tum lo. Thildang sawn tuah sak ka tum. Asinan Jesuh Khrih cun kan hrangah Amah le mah kha sangka ah a tuah aw a si. Kanmah le kan raal pawl karlak ah Amah a um ih in siatsuah theitu ding raal phunzakip in kham sak ih a tuurual pawl him te'n in umter.                                                                                                   Julie AckermanLink     Tuukhal kan naih deuhdeuh asile Cinghnia thawn kan hla aw deuhdeuh.