NITIN MANNA   2019 March 7 Tlawngkai Nili   Nunnak hrangih Huham   Kilkip in in rial nasa na'n kan kekzaam lo; a caancaan ah awloksong in kan um, asinain kan bei a dong lo.       – 2 Korin 4:8   Ka tlangval lai ah leknak hrangih thong dingmi plastic zuk ka nei. Keimah tluk fang saang ih tuahmi a si ih a mit-hmai hni siamsi ih zuk suaimi a si. Ka ngiarnak awkam cu ka lo thong ciamco dingih na tlu ding, ti a si. Asinan ziangtluk naa ih ka thok khal le a tho saal thei ringring. Thuthup cu ziang si pei? A tanglam ah khe (lead) thawn khingritmi ret sak a si ruangah ding tein a din thei ringringnak a si. Taanphawlawng pawl in tla himi thuhrampi hi an hmang ve. A tanglam ah khingritmi khe (lead) an ret ruangah ziangtluk thli hraang khal ah lawng let thei lo dingin a dohnget ringring thei.   Cumi cu zumtu pawl Khrih sungih nunnak hrihram kan bunmi thawn a bang awk. In ngiartu pawl lakah fek teih kan nun theinak dingih huham cu kanmai' sungah a um lo, kan sungih a ummi Pathian ih huham sawn ah a si. Kannih cu harsat buainak tong lo dingih ret kan si lo ih thlisia hraang ih nuai thei lo dingin a dang teih ret hleicemi kan si lo. Asinan Pathian huham cahnak sungah rin awzet in kan tthum awk asile Paul vekin, "Kilkip in in rial nasa na'n kan kekzaam lo; a caancaan ah awloksong in kan um, asinan kan bei a dong lo. Hrem kan si na'n taansan kan si lo; tuahmawh kan si na'n siatsuah kan si lo," ti'n nehnak thawn kan au thei ve ding a si (2 Korin. 4:8-9).   Khualtlawngtu mi tampi tithuknak ah harsat buainak lakah an um na'n a hnin thei lomi Pathian zaangfahnak kaifek ih a umtu pawl hnenah kom awla cuti'n kan cah lolai ah cakter kan si ding (2 Korin. 12:9). Cumi cu na thlarau nun hrangah tthum awknak hrampi a si ding.   - Joe Stowell   Na sungih Pathian huham cu na kiangkap ih buainak lo petu hnakin a maksak sawn.