England ram ih tourist hiiptubik pawl lakah pakhat cu Stonehenge ih lungto ṭhuam tumpi pawl hi an si. Hih granite lungto pawl ih sinak hi mangbangza thuthup a si. Kum tinte'n Stonehenge ra tlawngtu pawl cun: Ziangruangah an phun si pei? Engineering thiam maksak pawl hi teh zo pawl an si pei? Ziangti'n an rak tuah thiam si pei? timi thusuhnak pawl hi an suh tambikmi a si. Asinan khualtlawngtu pawl cu an thusuhmi ih thulehnak thei ngah taa loin an tlungkir saal cio. Lungto pawl cu ttong loin dai te'n an rung taang ringring ko.   Ca Thianghlim in cumi hnakih a maksak sawnmi mangbangza thuthup a nei – Pathian rori kha minung ah rung cang tahrat in minung pawl lakah a rung um timi thuthup (mystery) hi a si. Paul in, 1 Tim. 3:16 sungah, "Kan biaknak sungih thuthup hi a tum ngaingai a si, ti cu zokhal in an el thei lo ding: Amah cu minung taksa in a suak, a dikmi a si thu Thlarau in a langter; Cule vancungmi khal in an hmu; A thuhla cu miphun zakip hnenah phuan a si ih leilung khuazakip ah an zum. Cule sunlawinak ah laakso a si," ti'n a ngan.   Himi Khrih ih nun thuanthu tawi famkim in a langtermi – Pathian sinak thuthup – cu hminsin tlak taktak a si. Sersiamtu cu a sersianmi hnenah a ra, an lakah a nung ih an hrangah a thi, sikhalsehla, cumi cu thuthup a si lo. "Sikhalsehla Pathian in ziangtlukin so in duhdawt ti cu a langtger: misual kan si hrih na cingin kan hrangah Khrih cu a thi" (Rom 5:8). A maksakmi Pathian duhdawtnak cu thuthup ih hrampi a si ih thinglamtah in kan zate hmu thei dingin a langter.   Bill Crowder   Ziangti'n Khrih cu minung ah a cang timi cu thuthup a si, Asinan Pathian ih in duhdawtnak cu a lang fiangzet.