Ka fanute Melissa in a Bible sungah a nunnak tuah ṭhatu dingih a hmanmi hminsinnak ca pawl cu "Mell Notes" ti'n ka ko.   Thuṭhimnak ah, Matthai bung (7) sungah, caang (1) le (2) kiangte ah box zuk a suai ih midang tlunah thu va tthen hlah, ziangahtile midang parih thu na ṭhen tikah, na hmanmi tahfung hmangin midang in na parah thuṭhennak an lo tuah ve ding." Hiti'n a ngan hrih: "Midang na zoh hlanah nangmah le nangmah zoh aw hmaisa aw," tiin.   Melissa cu "midang pawl ih nunnak zawn a ruatzettu" tleirawl te a si. Filipi 2:4 hi a duhbikmi le atak ih a nunpimi Bible caang a si. A tlawngkaipi Matt, Kawhhran Nipi Tlawng ah nursery a zir thok ihsin atu phun (11) a zir tiang a nun zia a hmu ṭhehtu le a theitu, in Melissa motor accident ih a thih tikah, amah hngilh lonak ih kan tuahmi khawmnak service ah a simmi cu: "Melissa vekin midang pawl hniter le lungawiter theitu midang ka hmu thei ding ti'n ka ruat lo," a ti. A rualpi Tara khal in, "Nangmah vek midang lungawiter thei ringringtu ih rualpi ka si cu ka lungawi," ti'n a sim ve.   Midang tlunah nasazet ih thuṭhennak tuah ṭul ni le caan a thlen tikah, kan ciinken dingih a ṭhami cu duhdawtnak cun kanmah ihsin hramthok ding a si, timi hi a si. Paul in, "Atu ahcun a hmun ringringmi thil pathum a um ih zumnak, ruahsannak le duhdawtnak an si; himi lakah a tumbikmi cu duhdawtnak a si" a ti (1 Korin. 13:13).   Dave Branon   Pathian ih duhdawtnak kan hrangih kan pomfek cu Midang kan duhdawt theinak dingah tawhfung a si.