Bristol Phunsang Tlawng ih hliakhlainak vekin European rock ant cu kan umnak inn pawl hnakin a ṭha sawn men thei. Hliakhlaitu pawl ih an hmuh suakmi cu hnaṭuantu sihte pawl in thlingthlatu sihte pawl kha an nuntu khuasak daan le an dinhmun catbaang loih kilvengtu dingah an hmang. Rock ants pawl ih pakhat le pakhat an pehtlaih awk daan le hnatuan an thiam daan cu mifim scientist pawl hman an lungmit thei khop in a mak. Sihte pawl cu remzet ih hnaṭuan tlang daan an thiam, khuathim sung ih um daan, an siangpahrang bawinu le a faate pawl ih humhimnak dingah inn tiang an sak thiam.   Moses sanlai ah, Israel innsang mi pawl cu hmun thar ah umnak ding inn thar hawl in an um vingvo. Egypt ram ih sal an taanlai dinhmun cu zaangfahnak um lonak a si ruangah an harsa taktak. Sinai tlang le neelrawn ramcar ih an thlenlai ahcun umnak ding hrangih hmun khuarnak hman an nei lo. Asinan harsatnak pakhat an tong. Israel mi thlingthlatu pawl in Pathian ih a hruailuh tumnak ram sungah mi an rak um zo – cutawk ih mi pawl cu mitum zetzet an si ih Israel mi pawl cu mi fatetuk lawng kan si, tiih an sim ruangah (Mipum. 13:28, 33).   Sihte thawn kan nunnak tahṭhim sehla ṭhathnemnak a um ding. House-hungting rock ants pawl cun fimkhurzet in Sersiamtu ih lamzin an thlun ti kan hmu thei. Asinan kannih zumtu pawl cu a caancaan le Pathian rinsan thei loin ṭihphannak sawnin in uk ṭheu. Pathian umpinak le A duhdawtnak sungih kan ṭhum awk taktak ahcun, "Bawipa, Nangmah cu sankhat hnu sankhat kan umnak innpi na si," ti'n hnangamzet in kan ti thei ding a si.                                                                                                               Mart DeHaan   Pathian Inn sungih um in kan hmuh awk ding cu Kan hrangah hmun ṭhabik a si.