Keimah vek na si ahcun, nang tla ṭuanvo thar laak ding cu a cang thei lo tiih vun el dingah har na ti nasa ding – ahleice in thil ttha tuah ding le midang bawm ding thawn pehpar in. Kanmahlam in khuimi hi co-u kan pe ding, timi ciamciam teih hril ciami kan nei thei. Cucing in a caancaan ah thil tam deuh tuah dingih kan lungkim thei lo tikah, kan thillung sungah mawhphurhnak nei in asilole rinnak sungah ka nung lo mawsi? ti'n tla tuarnak kan nei thei men.   Asinan Thusimtu 3:1-3 sungih in sim bangin fimnak cun ziangtinkim in tikcu caan remcang an nei ti a thei ding – minung sinak mizia ih cangvainak sungah leilung tlun daan a si. Ziang hmuahhmuah in caan an nei ih leilung tlun thil tinkim hrangah tikcu remcang a um (c. 1).   Nupi pasal na nei ih nu le pa dinhmun ih na thlen hmaisabik caan tla a si thei. Tlawngkai na ṭheh ih hnatuannak sungah na lut thok, asilole fulltime hnaṭuannak ihsin pension na la pekte tla a si thei. Caankhat hnu caankhat kan tthawn awknak ah kan tumtahmi le co-u kan pekmi a thlengh aw thei. Ahlan ih kan rak tuahmi taanta in a dang pakhatkhat hrangah thazaang suah ding kan ṭul tla a si thei.   Kan kiangkap ruangah le ṭuanvo thar kan neih ruangah kan nunnak ih thlengh awknak a um tikah fimkhurzet ih kan theihthiam ding le ṭuanvo kan laak thiam ding a thupizet. Kan pumpeknak le ziangkim kan ttuannak ah, "Pathian sunlawinak hrangah siseh" ka ti a ṭul (1 Korin. 10:31). Thufim 3:6 ah, ziangkim ah Pathian kan rinsan asile kan fehnak lamzin cu Amah in lam in hruai ding, ti'n thu in kam a si.                                                                                                               Poh Fang Chia   Khrih sunlawinak hrangih pumpek ding cu Nitin ih in kotu sawmngiarnak a si.