Boxing thong thiam hminthangzet Muhammad Ali in mi a neh theinak dingah tactics phunphun a hmang; ih cumi lakah pakhat cu khatlam pa thinheng le thintok ko ṭongkam in a tuah ṭheu. George Foreman thawn 1974 kum ih an thong awk ṭum ah, Ali in Foreman thin hnaihnok ko a tuah, "Napi'n i thong hmen! Pakhatkhat i hmuh hnik, George. A naa lotuk. Na thiam lo deuh in ka thei" a ti. Foreman cu a thin a tok, a thinphang, a thacem in a rin awtuk nawn lo.   Cumi cu khuahlan ih an rak hman dahmi ti-daan (tactic) pakhat a si. Nehemiah in Jerusalem phardawl a cim zomi a sak saal reromi cu cinghnia hman kai sehla a cim thluh saal ding (Neh. 4:3), ti'n Tobiah le dodaltu pawl in hnaṭuantu pawl thinnau dingin hmuhsuamnak ṭongkam an hmang. Goliath khal in David ih hriamhrei hmanmi saili le saihlum kha nautatnak ṭongkam a hmang               (1Samuel 17:41-44).   Midang thinnau ko ṭongmi cu thiter theitu hriamhrei a si. Nehemiah in Tobiah ih thinnauternak cu a el, David in Goliath ih ṭongmi a leh vekin. David le Nehemiah cun an thinnaunak hnakin Pathian lawng an zoh ih A bomnak lawng an rinsan ruangah nehnak an co.   Hmuhsuamnak ṭongkam cu zohnen khal in a ra thei, nangmah thawn a naibik hnen khal in a ra thei. Asinan Pathian ih thukammi in thazaang in pek: "Ziangtik hmanah ka lo taansan lo ding" (Hebru 13:5), in ti ih Amai' bomnak rinsan dingin in ko a si (Hebru 4:16).                                                                                                 Lawrence Darmani     Thinharnak khur sungah na taanglai asile Tleunaklam pan in feh thlang aw.