Tubaite ah kan fapate kum 2 mi cu kedan (boot) tharte kan lei sak. A lung a awituk lawmmam ih ihkhun par a kai hlan sung cu a phoih lo. Asinan a thaizing ahcun boot a neih kha a hngilh ih ahlan ih a hruk kel sneaker te cu a hruk. Ka pasal in, "Boot kan lei sakmi hi ziangtluk in a man a khung ti kan fapa te in a theih ding ka duh," a ti.   Boot kedan cu a man a khungzet, asinan kan fahniang nauhak te cun nu le pa in nazi paziat sung hna kan ṭuan, thla-hlawh ziangzat kan ngah ih tax ziangzat kan pek ti a thei baan lo. Nauhak in kan pekmi laksawng cu lungawizet te'n in cosang ko, asinan annih cun thil thar an neih theinak dingah ziangtluk in nu le pa in kan zuam aw, timi theithiam in an sunloih thei lo ding, timi kan theih sak.   A caancaan ahcun kei tla nauhak bangin ka nung ṭheu. Ka kut pharh tahrat in Pathian ih duhdawtnak thawn in pekmi laksawng pawl ka cohlang, asinan lungawithu ka sim maw? Nunnak tlamtling ka neihmi ih a man a khun zia teh ka ruat thuk dah maw?   A man a khungzet, a siat theimi sui le ngun hnakin. 1 Peter Cakuat sungih kan siar vekin kumkhua nunnak kan co theinak dingah a man a khungzetmi Khrih ih thiisen sunglawi, mawh nei lo le sual nei lo Tuufano ih thiisen a luang a ṭul (1Pet. 1:18-19). Jesuh in a nunnak a pek, man khungzet a pek, Pathian innsang mi kan si theinak dingah. Cule Pathian in thihnak neh in a thawhter saal (c. 21).   Rundamnak kan comi ih a mankhun zia kan theih tikah thungai thlak ih lungawithu sim ding a si zia kan zir ngah.                                                                                                             Keila Ochoa   Rundamnak cu tah thei lo khop in a man a khungzet, Asinan a man zianghman laak loin alak ih pek kan si.