Microscope timi thilzohnak durbing hmangin kan zoh tikah minung mit ih kan hmuh thei lomi a nungmi organism pawl cu thli lakah, leilung parah, tidai sungah le kan taksa sungah tamzet an um ti kan hmu thei. Kan lei tisa mit ih hmuh theinak leeng ih um an si na'n cumi pawl thawn catbaang loin kan pehtlai aw ih kan ngiar/tawng aw ringring a si.   Thlarau leiram ih thil ummi pawl hi milai mit in kan hmu thei ṭheu lo, prophet Balaam ih hmuhtonmi bangin. Lamzin tluan ah a sal pahnih thawn an feh rerolai ah an tomi laak in Bawipa ih Vancungmi cu a kut ah naamsau keng ih a rak dingmi kha a hmu (Mipum. 23:23). Vancungmi kian dingin a laak cu lamzin ihsin hramlak ah a pial. A laak in vancungmi a hmuh tikah a khir ih Balaam ih ke cu lungtlap lakah a rial cih. Cutikah Balaam in a laak cu a vuak ciamco. Balaam in a minung mit in thlarau leiram ih thil ummi Bawipa ih vancungmi cu a hmu thei lo, Pathian ih a mit a on sak hlan lo cu! (c. 31).   Bible in thlarau leiram a um ti'n in sim, ih a caancaan ah cutawk hmun ihsin a ṭha siseh, a sia siseh kan tong ngah ṭheu (Hebru 13:2; Efesa 6:12). Himi ruangah kannih cu ralringzet ih um ding, thlacam ringring ding le timtuah cia ding kan si. Kan hmuh theimi leilungpi hi Pathian ih ukmi a si bangin kan hmuh thei lomi leilung khal hi Pathian in a uk thotho a si.   Vancung ih um kan Pa, Na sungah in umter in Na huham cahnak sungah nung thei dingin in bawm aw. Kan thlarau mit vangter awla kan hrangih thlarau in pekmi kan hmu thei ding, ti'n thlacam uhsi!                                                                                       Jennifer Benson Schuldt   Hmuh theimi le hmuh thei lomi zate cu Pathian ih uknak huham tangah an um.