Pathian ka naih deuh ih kan feh tlang tikah misual ka si zia roh deuh in ka thei aw ih cumi in ka thinlung in hnaihnok. Cun milai ih mizia umtu daan ka khaan sungih ka hmuhsuahmi in ka thinlung mit a vangter. Sangkate (window) ih puanzaar pahnih malte a dai aw lomi karlak ihsin ka khaan sungah tleunak a rung lut. Ka zoh tikah cumi nitleu sungah hnawm baal leivut fatete an langmi ka hmu. Cumi tleunak a um lo ahcun ka khaan sung cu a thiangfaizet vek a bang, asinan tleunak a um tikah cumi in hnawm baal a um ti a langter.   Cuih thil umtu daan ka hmuhmi in ka thlarau nun ah tleunak a pek. Tleunak a simi Bawipa ka naih deuh caan ah keimah le keimah fiangzet in ka hmu aw. Kan nunnak khuathim sungah Khrih ih tleunak a rung thlen tikah cumi in kan sualnak a langter – cumi cu kan ṭihhrutnak dingah si loin tangdornak thawn Amah kan rinsan theinak dingah a si sawn.   Kanmai' dingfelnak parah hngatsan thei kan si hrimhrim lo, ziangahtile kannih cu misual kan si ih Pathian sunlawinak kan co baan lo (Rom 3:23). Kan uar awk caan ah, tleunak in kan thinlung a langter ih Isaiah vekin kan ṭap, "Ka cem a si! Ka ruahsan ding zianghman a um nawn lo. Ka hmur ihsin a suakmi ṭongkam hmuahhmuah cu a sualmi ṭongkam an si ṭheh; misual lakah ka um ih hmurka thiang lo lakah ka leeng. Atu ah ka mit rori in Siangpahrang, Cungnungbik Bawipa ka hmu fawn" (Isaiah 6:5).   Pathian cu a famkim. Amah pantu cun uar aw loin tangdornak le rinsannak thinlung thawn pan a ṭul. A zaangfahnak in in hiip. Zianghman ka si lo ti theithiam aw in Amah lawng hngatsan ding a si.                                                                                                 Lawrence Darmani   Pathian thawn kan feh tlang tikah, Porh awknak ding hmun a um thei lo.