Show notes
NITIN MANNA 2019 February 20 Tlawngkai Nithum Khingrit Zaangter Kannih khal hitluk in a tammi thutheitu pawl in mero bangin in kil ruangah kan fehnak lamzin ah in dawnkhamtu thil pawl kha hlon in in ṭawnṭemtu kan sualnak thilrit cu tlaansan tahrat in kan hmai ih a ummi tlanzuamnak ah taimak suah in tlan uhsi! – Hebru 12:1 1628 kum August 10 ni cu tiralkap thuanthu ah thimkhawzing tlun ni a si. Cumi ni ah Vasa tiralkap tinbaw cu a poksuak. Kum (2) rei an sak hnu ah, thilri 64 cannons phur thei dingin nasatak in ceimawi a si, ti'n Swedish navy cun uarzet in a sim. Asinan tinbaw cu tifingriat sung peng khat a fehnak ah a pil. Ziangmisi palhnak a um? Thil an phurhtermi a rittuk ruangah a si. A phurh thei zat hnakih tamtuk thil an phurhtermi in Vasa cu tifingriat tawne ah a thlenter a si. Christian nun tla hi thilrittuk phurhnak in in dir-thla thei ve a si. Kan thlarau nun khualtlawnnak hrangih thazaang peknak ah Hebru cangantu in, "Kan fehnak lamzin ah in dawnkhamtu thil pawl kha hlon tahratin in ṭawnṭemtu kan sual thilrit cu tlansan tahrat in kan hmai ih a ummi tlanzuamnak ah taimak suah in tlan uhs! Kan zumnak a thoktu le a famkimtertu Jesuh kha cat loin zoh uhsi," a ti (Heb. 12:1-2). Nasazet ih ceimawimi tinbawpi vekin kannih tla a lenglam pianzia midang ih hmuh mawi dingih project tampi nei in kan um men thei. Asinan kan sunglam nun muru ahcun sualnak thilrit ih dirh hnukmi tla kan si thei ih hnaihnoknak tla a um thei. Sikhalsehla damter theinak lamzin a um. Pathian ih lamhruainak le Thlarau Thianghlim ih thazaang peknak parih hngatsannak in kan thilrit cu a zaangter thei ih kan tuar theinak khal a lang thei saal a si. Ngaidamnak le zaangfahnak cu thlaraulam khualtlawngtu zumtu pawl hrangah cat baang loin ngah theih ringring a si. - Dennis Fisher Tuar theinak cu cahnak le duhnak hnakin thil a tithei.
