"Thil ziangkim na duhnak vekin cang hram seh!" ti hi Tuluk Kum Thar (Chinese New Year) caan ih pakhat le pakhat an cibaibuk awknak ṭongkam a si tlangpi. Mangbangza a simi cu ka nun ih thilcangmi pawl hi keimai' duhnak vekin si loin Pathian ih duhnak sawn in a si ringring.   Duhhrilnak pek sitaa bang sehla, Joseph in Egypt ram ih sal dinhmun hi a hril lo ding (Seem. 39:1). Asinan sal sinak sungin "a hlawhtling" ziangahtile "Bawipa cu a hnenih a um ruangah" a si (c. 2). Bawipa in Joseph ruangah a Bawipa ih innsang tla thluasuah a pek (c. 5).   Mai' duhhril sisehla Joseph in Egypt ih thawngtlak cu a hril lo ding. Asinan amah cu mawh lo cingin nupa sualnak thu ah sualpuh a si ih thawngthlak tiang a tuar. Sikhalsehla, kan hmuhmi cu "Bawipa cu Joseph hnenah a um" timi a si (c. 21). Thawnginn sungah thawnginn kiltupa ih rinsan mi a si (c. 22). Bawipa in a umpi ruangah ziang hmuahhmuah a tuahnak ah a hlawhtling (c. 23). A nunnak ih a niambik dinhmun thawngtla sinak cu Egypt ram ih dinhmun saangzet a thlen theinak dingih hramthlaknak ah a cang.   Pathian in Joseph cu Egypt ram ih a hruai thlennak hi tumtahnak tumpi a neih ruangah a si. Cuvekin zumtu kan hrangah Pathian in kan umnak ciar ih in retnak hi tumtahmi a nei a si. Thil ziangkim hi kanmai' duhnak vekin cang thluh dingah ruahsan loin, kan Bawipa in thinglamtah thihnak a tuar hlan ah, "Ka duh vekin si hlah seh, na duh vekin si ko she," a timi vekin thlacam thei cio uhsi (Matt. 26:39).                                                                                                             C. P. Hia   Thinsau teih hngak hi Pathian duhmi tuahnak ih a saangbikmi lamzin a si ṭheu.