James Michener ih nganmi Centennial timi cabu cu thinlung sungih suangtuahmi thuanthu le Nitlaknaklam America ram dinnak thu a si. France-Canadian sumdawng pa Pasquinel ih khurkhua hmuh theinak thawngin, Michener in hmunrawn Arapaho le European hrambunmi Saint Louis mibur pahnih ih thuanthu a kom sak thei. Hih a hraapzetmi le hmunrawnpi karlak ah ralṭhazet ih a feh ngamnak ruangah amah cu a bang aw lomi leilung pahnih pehzomtu lilawn (bridge) ah a hung cang.    Jesuh Khrih ih dungthluntu pawl tla a dang awzetmi leilung pahnih – Jesuh Khrih thei le zum ih a dungthluntu pawl le Jesuh Khrih a thei hrih lotu pawl – karlak ah pehzomtertu lilawn don theinak caan ṭha kan nei thei ve a si. Thessalonica khua ih zumtu pawl tla zuk-biaknak nunphung neitu an kiangkap ih zumlotu pawl le Khrih karlak ah pehzomnak lilawn an don thei thu Paul in a sim: "Ziangahtile Bawipa ih Thu cu nanmai' hnen ihsin Masidonia le Akhaia peng khuazakip ah a thlen lawng si loin Pathian nan zumnak thu cu khuaza ramkip ah a thang a si" a ti (1 Thess. 1:8). An lilawn donmi cu phun hnih in sim a theih: "Pathian Ṭongkam (Word of God)" le "zohṭhim tlak nunzia (example)" in a si. Mikip hrangih a fiangzetmi cu Thessalonica khua ih zumtu pawl cun ahlan ih an rak biakmi milem zuk pawl kha taansan tahratin Pathian hnenah an pan ih a nungmi Pathian bia le rian in an um.   Pathian in Amah le Amah cu A Thu (Ca Thianghlim) ihsin le zumtu pawl ih nunnak (character of believers) hmangin kan kiangkap ih a phuanlang awk tikah kannih cu Khrih ih duhdawtnak a thei hrih lotu pawl hrangah anmah le Pathian karlak pehzomtertu lilawn ah kan cang thei a si.                                                                                                 Bill Crowder   Thuthangṭha cu nunpi awla midang in an ngai ding.